نیر بخاری نے کہا ہے کہ تحریک انصاف کی پنجاب اسمبلی میں ہنگامہ آرائی پارلیمنٹ پر حملہ ہے۔

پیپلزپارٹی کے سیکرٹری جنرل نیر بخاری نے کہا ہے کہ ڈپٹی اسپیکر پنجاب اسمبلی پر تشدد کی جتنی مذمت کی جائے کم ہے، تحریک انصاف تحریک فروغ انتشار بن گئی ہے۔

انہوں نے کہا ہے کہ تحریک انصاف کی پنجاب اسمبلی میں ہنگامہ آرائی پارلیمنٹ پر حملہ ہے، پنجاب اسمبلی پر حملہ آوری کرکے تحریک انصاف اور اتحادیوں نے شرمناک تاریخ رقم کی ہے۔

نیر بخاری نے کہا ہے کہ تحریک عدم اعتماد آئینی عمل ہے، غنڈہ گردی کے مرتکب آئین کے مجرم ہیں۔

واضح رہے کہ پنجاب اسمبلی میں وزیر اعلیٰ کے انتخاب کے لئے اجلاس سے قبل شدید ہنگامہ ارائی کا واقعہ پیش آیا جس دوران ڈپٹی اسپیکر دوست مزاری کو حکومتی ارکان کی جانب سے شدید تشدد کا نشانہ بنایا گیا ہے۔

ہاتھا پائی میں سابق صوبائی وزیر خیال کاسترو سمیت سابق مشیر وزیر اعلیٰ عمر فاروق بھی شامل تھے جبکہ اسمبلی ممبران اور سیکیورٹی اہلکاروں نے بیچ بچاؤ کروایا ۔

 بعد ازاں ڈپٹی اسپیکر ایوان چھوڑ کر چلے گئے۔

یاد رہے کہ پنجاب اسمبلی میں نئے قائد ایوان کا انتخاب آج ہو رہا ہے۔

سیکیورٹی انتہائی سخت

پنجاب سمبلی میں کسی بھی ناخوشگوار واقعے سے نمٹنے کے لیے سیکیورٹی کے سخت انتظامات کئے گئے ہیں۔

 اسمبلی کے اطراف دفعہ 144 نافذ ہے ۔

’نیتیں شفاف نہیں‘

وزارتِ اعلیٰ کے امیدوار چوہدری پرویز الہٰی نے اسمبلی آمد کے موقع پر میڈیا سے بات کرتے ہوئے کہا کہ آج وہ اسمبلی کے کسٹوڈین نہیں بلکہ وزارتِ اعلیٰ کا امید وار ہیں۔

پرویز الہیٰ نے کہا کہ کوشش کریں گے الیکشن شفاف ہو، لیکن نیتیں شفاف نہیں، وقت ثابت کرے گا کہ ڈپٹی اسپیکر ایماندار ہے یا نہیں۔