پاکستانی نشریاتی اداروں میں بطورِ نیوز اینکر کام کرنے کے بعد شوبز کی دنیا میں والدہ ساس اور بڑی بہن کے کردار ادا کرکے شہرت حاصل کرنے والی اداکارہ صبا فیصل نے زائد العمر خواتین کو وزن کم کرنے کا آسان نسخہ بتا دیا۔

ڈراموں میں اپنی بہترین اداکاری سے سب کے دلوں میں راج کرنے والی اداکارہ صبا فیصل نے زائد العمر خواتین کو وزن کم کرنے کا آسان نسخہ بتاتے ہوئے انکشاف کیا ہے کہ انہوں نے سادہ طریقے سے اپنا وزن کم کیا۔

صبا فیصل نے حال ہی میں رابعہ انعم کے رمضان شو میں شرکت کی، جہاں انہوں نے ادھیڑ عمری میں خواتین کی فٹنیس اور خصوصی طور پر وزن کو کم کرنے کے معاملے پر کھل کر باتیں کیں۔

صبا فیصل کا کہنا تھا کہ ان کی جانب سے وزن کم کیے جانے پر ان کی بیٹی اداکارہ سعدیہ فیصل بھی حیران رہ گئیں اور انہوں نے انہیں شاباشی بھی دی۔

اداکارہ کا کہنا تھا کہ اگرچہ ان کی بیٹی سعدیہ فیصل فٹ رہنے کے لیے نہ صرف ڈائٹنگ کرتی ہیں بلکہ وہ ورزش بھی کرتی ہیں، تاہم ان کے مقابلے انہوں نے منظم انداز میں خود کو فٹ کیا۔

ایک سوال کے جواب میں صبا فیصل نے بتایا کہ وہ جب بیرون ممالک یا بیرون شہر جاتی ہیں تو وہاں کے کھانوں کے ذائقے کے حساب سے ڈائٹنگ کو کچھ وقت کے لیے بھول جاتی ہیں اور وہ کھانوں کا ذائقہ ضرور چکھتی ہیں کیونکہ وہ کھانے پینے کی بےحد شوقین ہیں۔

اداکارہ نے بتایا کہ ادھیڑ عمری کے باوجود انہوں نے ڈائٹنگ کے لیے سادہ اصول اپنائے اور کچھ ہی وقت میں اپنا وزن کم کرکے خود کو بہتر بنایا۔

صبا فیصل نے کہا کہ انہوں نے وزن کم کرنے کے لیے چاول اور روٹی سمیت چینی کا استعمال ختم کر دیا اور انہوں نے کبھی کبھی براؤن چاول کھائے۔

انہوں نے بتایا کہ انہوں نے چکناہٹ والے کھانے بھی بند کرکے بوائل چیزیں سبزیاں اور مچھلی وغیرہ کھائیں۔

صبا فیصل کا کہنا تھا کہ انہوں نے مرغی چھوڑ کر مٹن کھانا شروع کیا اور ڈائٹ کی وجہ سے وہ آخری بار رات 8 بجے ہلکی پھلکی غذا کھاتی ہیں۔

انہوں نے خواتین کو مشورہ دیا کہ وہ رات کو بھی زیادہ سے زیادہ پانی پیا کریں، اگرچہ زیادہ پانی پینے سے نیند خراب ہوتی ہے مگر وہ صحت کے لیے اچھا ہوتا ہے۔

اداکارہ نے ادھیڑ عمر خواتین کو تجویز دی کہ وہ تھوڑی سی ہمت کرکے ڈائٹنگ کرلیں اور کچھ دنوں کی مشکل کے بعد وہ عادی ہوجائیں گی اور ان کا وزن کم ہوجائے گا۔