بالی وُڈ کے سُپر اسٹار عامر خان انڈین پریمیئر لیگ (آئی پی ایل) میں کھیلنے کےلیے کوششیں کرنے لگے، ویڈیو وائرل ہوگئی۔

بھارتی میڈیا رپورٹ کے مطابق لگان فلم کے بہترین کھلاڑی اور اداکار عامر خان نے اپنی ایک ویڈیو آفیشل انسٹاگرام اکاؤنٹ پر شیئر کی ہے جس میں وہ کرکٹ کھیلتے نظر آرہے ہیں۔

ویڈیو میں دلچسپ بات یہ ہے کہ عامر خان کرکٹ کھیلتے ہوئے کیمرے کے سامنے کھڑے ہوکر مداحوں کو مخاطب کرتے ہوئے کہتے ہیں کہ ’کیا انڈین پریمیئر لیگ (آئی پی ایل) میں موقع مل سکتا ہے؟‘

اس ویڈیو کو سوشل میڈیا صارفین اور اداکار کے مداحوں کی جانب سے خوب پسند کیا جا رہا ہے۔

ویڈیو میں عامر خان اپنے مداحوں کو بتاتے ہیں کہ 28 تاریخ کو وہ ایک کہانی سنانے والے ہیں، جس کیلئے وہ بہت پُرجوش ہیں۔

واضح رہے کہ اداکار عامر خان کی کھیلوں سے محبت کسی تعارف کی محتاج نہیں ہے، وہ کھیلوں کے حوالے سے متعدد فلموں میں کام کرچکے ہیں جو باکس آفس پر ہٹ بھی ہوئیں جن میں ’لگان اور دنگل‘ سرفہرست ہیں۔