مسلم لیگ ن کے رہنما احسن اقبال نے کہا ہے کہ عمران خان نے کرسی اور سیاست بچانے کیلئے آئین کو ذبح کیا۔

احسن اقبال نے سپریم کورٹ کے باہر میڈیا سے گفتگو کرتے ہوئے کہا کہ امید ہے سپریم کورٹ آئین کی بالادستی کوبحال کرے گی اور  عدالت آئین شکنوں کو جیل بھیجنے کا حکم دے گی۔

انہوں نے کہا کہ اتحادی چھوڑ گئے تو ایک دم سازشی تھیوری لے آئے، پاکستان کو آئینی بحران میں دھکیل دیا گیا، آئین کی حفاظت کیلئے کھڑا ہونا ہر شہری کا فرض ہے۔

ن لیگی رہنما کا کہنا ہے کہ عمران نیازی نے کرسی اور سیاست بچانے کیلئے آئین کو ذبح کردیا، امریکا نے دھمکی دی تو انکے سفیرکو دعوت کیوں دی گئی تھی۔

احسن اقبال نے کہا کہ عمران خان نے امریکا میں غیرقانونی سرگرمیاں کیں، ان سرگرمیوں پرعمران نیازی کو تحقیقات کا سامنا ہے۔

مسلم لیگ ن کے رہنما نے کہا کہ عمران نیازی نے امریکا سے منی لانڈرنگ کی اور انہوں نے پاک امریکا تعلقات داؤ پر لگا دیئے۔

انہوں نے کہا کہ عمران خان نے خارجہ پالیسی کو داؤ پر لگا دیا، انہوں نے پاکستان کے ساتھ بدترین مذاق کیا۔

احسن اقبال نے مزید کہا کہ عمران خان نے منی لانڈرنگ کی، فارن فنڈنگ کیس میں عمران نیازی کی چوری پکڑی گئی ہے۔