صدر مملکت ڈاکٹر عارف علوی کی جانب سے سرکاری معلومات لیک کرنے والے بدعنوان نیب اہلکار کی سزا برقرار کردی گئی۔

تفصیلات کے مطابق صدر مملکت نے نیب اہلکار کو کرپشن کیلئے سرکاری معلومات  لیک کرنے پر سزا کے خلاف اپیل مسترد کر دی، صدر مملکت کا کہنا تھا کہ نیب سرکاری راز افشاء کرنے کے کیسز میں ملوث دیگر افسران کے خلاف بھی کارروائی کرے۔

انہوں نے کہا کہ افسوس کہ انسدادِ بدعنوانی کیلئے ذمہ دار ادارے نیب کے اندر ہی کرپشن کی گئی۔

واضح رہے کہ نیب کے گریڈ 16 کے اہلکار، نعمان اقبال نے غیر قانونی طور پر غیر مجاز افراد کو سرکاری معلومات دی، انکوائری میں جرم ثابت ہونے پر اہلکار کو پانچ سال کیلئے نچلی پوسٹ پر تنزلی کی سزا دی گئی۔

نیب اہلکار نے سزا کے خلاف صدر مملکت کو اپیل دائر کر رکھی تھی، نیب، کراچی نے سورس رپورٹ کی بنیاد پر انکوائری کی، اپیل کنندہ کے موبائل سے خفیہ ریکارڈ ملا، نیب اہلکار کے فون کے فرانزک تجزیے میں گفتگو اور دستاویزات سے بھی جرم ثابت ہوا۔

نیب نے نعمان اقبال کے خلاف تادیبی کارروائی شروع کرنے کی سفارش کی تھی، انکوائری کمیٹی نے درخواست گزار کو “بدانتظامی ” اور “سرکاری راز افشا کرنے” کے الزام میں قصور وار قرار دیا، نعمان اقبال نے نیب ایمپلائز سروسز رولز کے تحت صدر کو سزا کے خلاف اپیل دائر کی۔

صدر مملکت ڈاکٹر عارف علوی کا کہنا تھا کہ اہلکار نے فیصلہ کے خلاف کوئی معقول وجہ یا اضافی جواز فراہم نہیں کیا، ایسے افراد کے لیے پانچ سال کی سزا انصاف نہیں، سزا مزید سخت ہونی چاہیے تھی، نیب معاملے میں ملوث دیگر افسران کا قصور ثابت ہونے پر ملک کو دھوکہ دینے، امیج خراب کرنے پر سزا دے۔