مسلم لیگ ق نے بھی لاہور ہائیکورٹ میں حمزہ شہباز کی درخواست میں فریق بننے کے لیے ہائیکورٹ سے رجوع کرلیا۔

تفصیلات کے مطابق مسلم لیگ ق کے جنرل سیکریٹری کامل علی آغا کی جانب سے لاہور ہائیکورٹ میں متفرق درخواست دائر کی گئی۔

کامل علی آغا کی جانب سے عامر سعید راں ایڈوکیٹ نے متفرق درخواست دائر کی۔

ق لیگ نے متفرق درخواست میں مؤقف اپنایا کہ وزیراعلی پنجاب کے انتخاب میں چودھری پرویز الہی بھی امیدوارہیں۔

عامر سعید راں ایڈوکیٹ نے ق لیگ کی طرف سے یہ مؤقف بھی پیش کیا کہ لاہورہائیکورٹ میں حمزہ شہباز اور دوست محمد مزاری کی درخواست زیرسماعت ہے، عدالت سے استدعا ہے کہ اس کیس ہمیں بھی فریق بننے کی اجازت دی جائے۔

ق لیگ نے درخواست میں مؤقف دیا کہ اراکین اسمبلی کو مختلف ہوٹلز میں محبوس رکھا گیا ہے۔ مبحوس اراکین اسمبلی کو ہوٹلز سے باہر نکالنے کا حکم دیا جائے۔

واضح رہے کہ گذشتہ روز لاہورہائیکورٹ نے دوست محمد مزاری اور حمزہ شہباز کی درخواستوں پر فریقین کو نوٹس جاری کیے۔

عدالت نے دوست محمد مزاری اور حمزہ شہباز کی درخواستوں پرسماعت کرتے ہوئے اسپیکرپنجاب اسمبلی، آئی جی پنجاب، چیف سیکریٹری پنجاب سمیت دیگر فریقین کو 11 اپریل کیلئے نوٹس جاری کیے۔

حمزہ شہباز شریف کی جانب سے دائر درخواست میں مؤقف اپنایا گیا کہ وزیراعلی پنجاب کے تقررکے لیے بلا جواز تاخیر کی جا رہی ہے۔ حمزہ شہباز وزیراعلی پنجاب کا انتخاب نہ ہونے کی وجہ سے متاثرہ فریق ہیں۔