پارلیمانی لیڈر و جنرل سیکرٹری پیپلزپارٹی وسطی پنجاب سید حسن مرتضیٰ کا کہنا ہے کہ آئینی عہدوں پر آئین شکن افراد کا ہونا ملک و قوم کے لئے نقصان دہ ہے۔

حسن مرتضیٰ نے اپنے جاری کردہ بیان میں کہا کہ صدر مملکت کا وزیراعلیٰ پنجاب کی حلف برداری کے لیے چیئرمین سینٹ کو بھیجنا خوش آئند ہے۔

انہوں نے کہا کہ پاکستان کے سب سے بڑے صوبے میں 22 دنوں سے حکومت کا نام و نشان نہیں، آئین شکن سیاست دانوں میں سے کسی کا سپنا ٹوٹا تو کوئی پیٹ سے خراب ہوگیا۔

جنرل سیکرٹری پیپلزپارٹی وسطی پنجاب نے کہا کہ گورنر پنجاب کی صحت ناساز ہے انہیں ‘گیٹ ویل سُون’ کہوں گا، یہ صدمے میں ہیں انہیں ذہنی امراض کے ڈاکٹر کی ضرورت ہے۔

یہ بھی پڑھیں: گورنر پنجاب عمر سرفراز چیمہ کی اچانک طبیعت خراب

حسن مرتضیٰ نے کہا کہ عمر چیمہ کو سروسز اسپتال نہیں اس کے پیچھے واقع دماغی اسپتال میں داخل کیا جائے، ان کے پیچھے پیچھے عمران خان کو بھی اسی ہسپتال بھیجا جائے گا۔

پارلیمانی لیڈر کا کہنا ہے کہ دعاگو ہوں کہ گورنر پنجاب بھی صدر مملکت کی طرح جلد صحتیاب ہوکر اپنی آئینی ذمہ داریاں سمجھ سکیں۔

انہوں نے مزید کہا کہ آئینی عہدوں پر آئین شکن افراد کا ہونا ملک و قوم کے لئے نقصان دہ ہے، عوام کو فوری طور پر مہنگائی اور لاقانونیت سے ریلیف دلوانا حکومت کی اولین ترجیح ہونی چاہیے۔