پاکستان کرکٹ بورڈ(پی سی بی) کے سابق چیف ایگزیکٹو وسیم خان انٹرنیشنل کرکٹ کونسل (آئی سی سی) میں جنرل منیجر بننے کے لیے تیار ہیں، یہ بات انگلش صحافی جارج ڈوبل نے بتائی۔

رپورٹ میں بتایا گیا کہ وسیم کو اس کردار کے لیے شارٹ لسٹ کیا گیا ہے اور اگلے ہفتے دبئی میں ان کا انٹرویو کیا جائے گا۔

اس وقت آئی سی سی میں جنرل منیجر کا عہدہ جیوف ایلارڈائس کو آئی سی سی کے سی ای او کے عہدے پر ترقی دیے جانے کے بعد خالی ہے،ترقی پانے سے پہلے انہوں نے اپنے عہدے پر کل آٹھ سال گزارے تھے۔

وسیم خان ایک موقع پر، ٹام ہیریسن کو انگلینڈ کرکٹ بورڈ( ای سی بی) کے چیف ایگزیکٹو کے طور پر تبدیل کرنے کی دوڑ میں بھی تھے۔

انہوں نے گزشتہ سال پی سی بی میں اپنے عہدے سے استعفیٰ دے دیا تھا جب نیوزی لینڈ اور انگلینڈ نے سیکیورٹی خدشات کے باعث ملک میں دورے ترک کردیے تھے۔

یہ استعفیٰ پاکستان کے سابق کپتان رمیز راجہ کے بطور چیئرمین پی سی بی منتخب ہونے کے دو ہفتوں کے اندر سامنے آیا تھا۔