چیف سیکرٹری پنجاب کامران علی افضل نے کہا ہے کہ اسموگ پر قابو پانے کیلئے ابھی سے کام شروع کرنا ہو گا۔

چیف سیکرٹری پنجاب کامران علی افضل کی زیر صدارت اجلاس ہوا جس میں ایڈیشنل چیف سیکرٹری اور تمام محکموں کے سیکرٹریز نے شرکت کی۔

  کامران علی افضل نے کہا کہ سرکاری امور کی انجام دہی کسی صورت متاثر نہیں ہونی چاہیے، افسران کی کارکردگی کی جانچ کیلئے کے پی آئیزمتعارف کرائے گئے ہیں۔

انہوں نے کہا کہ تمام افسران آن لائن پورٹل پر مکمل ڈیٹا کی دستیابی دس روز میں یقینی بنائیں اور زیر التواء پنشن کیسز جلد از جلد نمٹانے کی کوشش کریں۔

کامران علی افضل نے کہا ہے کہ اسموگ پر قابو پانے کیلئے ابھی سے کام شروع کرنا ہو گا، دھواں چھوڑنے والی گاڑیوں اور ماحولیاتی آلودگی کا باعث بننے والی فیکٹریوں کیخلاف کارروائی کی جائے۔

چیف سیکرٹری پنجاب نے کہا کہ تمام محکمے انسداد ڈینگی کے حوالے سے جاری گائیڈلائنز پر عملدرآمد یقینی بنائیں، صوبہ بھر میں انسداد ڈینگی سرگرمیوں اور اسپرے کے عمل کو تیز کیا جائے۔

انہوں نے کہا کہ عوام کو ریلیف کی فراہمی کیلئے رمضان بازاروں میں بہترین انتظامات کیے جائیں۔

چیف سیکرٹری نے تمام محکموں کے سیکرٹریز کو رمضان بازاروں کے دورے کرنے کی ہدایت کی۔