کوک اسٹوڈیو سیزن 14 کے گانے ’پسوڑی‘ سے شہرت حاصل کرنے والی گلوکارہ شے گِل نے عالمی شہرت یافتہ گلوکار نصرت فتح علی خان کا گانا گا کر سر ہی بکھیر دئیے ۔

سوشل میڈیا پر شے گل کا یہ کلپ تیزی سے مقبول اور شئیر کیا جا رہا ہے ، جس میں دیکھا اور سنا جا سکتا ہے کہ گلوکارہ  اپنی منفرد آواز میں شہنشاہ قوال استاد نصرت فتح علی خان کا مقبول ترین گانا ’تیرے بن نہیں لگتا دل میرا ڈھولنا‘ گا رہی ہیں۔

ویڈیو دیکھیں:

شے گل کا تعلق پنجاب کے دارالحکومت لاہور سے ہے اور ان کی عمر 23 برس ہے جب کہ انہوں نے ہاسٹل میں دوستوں کے ہمراہ رہنے کے دوران مذاق میں گلوکاری کا آغاز کیا تھا۔

انہوں نے اپنا حقیقی نام ابھی تک نہیں بتایا اور اس حوالے سے کہنا ہےکہ جیسے ہی انہوں نے گلوکاری کا آغاز کیا تو دوستوں نے انہیں شے گِل کہنا شروع کیا اور انہوں نے یہی نام استعمال کیا۔

ایک انٹرویو کے دوران پسوڑی سنگر نے بتایاکہ ان کی خواہش ہے کہ وہ ’آسکر‘ ایوارڈ یافتہ موسیقار اللہ رکھا رحمٰن (اے آر رحمٰن) سمیت پاکستانی میوزیکل بینڈ ’ینگ اسٹنرز‘ کے ساتھ بھی کام کریں۔

ایک اور سوال کے جواب میں ان کا کہنا تھا کہ رواں برس وہ شاعری لکھنے سمیت کلاسیکل میوزک کو سمجھنے کا ارادہ رکھتی ہیں اور انہیں یقین ہے کہ وہ ایسا کر لیں گی۔

شے گِل نے رواں سال 7 فروری کو اپنا کوک اسٹوڈیو کا پہلا گانا ’پسوڑی‘ ریلیز ہونے پر بتایا تھا کہ انہوں نے مذاق مذاق میں دوستوں کے ہمراہ ہاسٹل میں گلوکاری کا آغاز کیا تھا مگر اب وہ پروفیشنل گلوکارہ بن چکی ہیں۔