ایڈمنسٹریٹر کے ایم سی سندھ حکومت کے ترجمان و مشیر قانون سندھ بیرسٹر مرتضی وہاب نے کہا ہے کہ دہشتگرد کراچی کا امن خراب کرنا چاہتے ہیں۔

تفصیلات کے مطابق سندھ حکومت کے ترجمان  مرتضی وہاب رات گئے شہر قائد کے علاقے صدر پہنچے اور دھماکے کی جگہ کا معائنہ کیا۔

ایڈمنسٹریٹر کراچی مرتضی وہاب نے پولیس حکام سے ملاقات اور دھماکے سے متعلق تفصیلات حاصل کیں۔

اس موقع پر میڈیا سے گفتگو کرتے ہوئے ایڈمنسٹریٹر کراچی مرتضی وہاب نے کہا کہ دھماکے میں ملوث عناصر کو قانون کے کٹہرے میں لائینگے۔

 بیرسٹر مرتضی وہاب کا کہنا تھا کہ دہشتگرد شہر کا امن خراب کرنا چاہتے ہیں۔

واضح رہے کہ کراچی کے مصروف ترین کاروباری مرکز صدر میں کوسٹ گارڈ کی گاڑی کے نزدیک ہونے والے دیسی ساختہ بم دھماکے کے نتیجے میں ایک شخص جاں بحق اور 8 افراد زخمی ہوئے ہیں۔

واقعے کی ابتدائی رپورٹ کے مطابق دھماکا صدرکے مصروف ترین علاقے میں واقع یونائیٹڈ بیکری کے نزدیک پاکستان کوسٹ گارڈ کی گاڑی کے پاس ہوا جبکہ سی ٹی ڈی کی ٹیم بھی دھماکے کی تحقیقات کے لیے جائے وقوعہ پرموجود تھی۔

دھماکے سے کئی گاڑیاں اورموٹرسائیکلیں تباہ جب کہ متعدد گاڑیوں کے شیشے ٹوٹ گئے ہیں۔

دھماکے کے نتیجے میں جاں بحق ہونے والے شخص کی لاش اورزخمیوں کوابتدائی طبی امداد کے لیے جناح اسپتال منتقل کردیا گیا تھا۔