نوری آبادپاورپلانٹ ریفرنس کیس میں شریک ملزمان کی بریت کی درخواستوں پرنیب نے جواب جواب جمع کروا دیا۔ 

تفصیلات کے مطابق احتساب عدالت اسلام آباد میں نوری آباد پاور پلانٹ ریفرنس کی سماعت ہوئی۔

احتساب عدالت کے جج اصغرعلی نے ریفرنس کی سماعت کی جس میں وزیراعلی سندھ سید مرادعلی شاہ سمیت دیگر ملزمان عدالت کے روبرو پیش ہوئے۔

شریک ملزمان سلطان فاروق، سید مسعود الحسن ، شازیہ جعفر سمیت دیگر کی دراخواستوں پر نیب نے جواب جمع کروایا۔

وکلا شریک ملزمان نے کہا کہ نیب کا نیا بل پارلیمنٹ نے منظور کیا ہے، نیب بل گزٹ نوٹیفکیشن کیلئے صدر پاکستان کے پاس گیا ہوا ہے۔

شریک ملزمان کے وکلا نے عدالت سے استدعا کی کہ احتساب عدالت نیا نیب بل لاگو ہونے تک کارروائی مؤخر کرے۔

جج اصغرعلی نے استفسار کیا کہ نیب کا نیا بل کب تک آ جائے گا؟

شریک ملزمان کے وکلا نے عدالت کو بتایا کہ صدرپاکستان کی منظوری کے بعد فوری لاگو ہو جائے گا جس کے بعد احتساب عدالت نے سماعت مزید کارووائی کیلئے 16جون تک ملتوی کردی۔