پاکستان سپر لیگ (پی ایس ایل) سیزن 7 اور 8 کے نشریاتی حقوق اور آئی سی سی ٹی ٹوئنٹی  ورلڈ کپ کے پاکستان ٹیلی ویژن (پی ٹی وی) اور ایک نجی چینل کے درمیان ہونے والے معاہدے کے نتیجے میں قومی خزانے کو بھاری نقصان پہنچا ہے۔

تفصیلات کے مطابق اس بات کا انکشاف پیر کو ایک فیکٹ فائنڈنگ کمیٹی کی رپورٹ میں کیا گیا جو گزشتہ حکومت کے دور میں تشکیل دی گئی تھی۔

پی ٹی وی نے پی ایس ایل 7 اور 8 کے ساتھ ساتھ ورلڈ کپ کی نشریات کے معاہدوں کے لیے ایک نجی چینل کے ساتھ کنسورشیم میں معاہدہ کیا تھا۔

کمیٹی کو یہ دیکھنا تھا کہ آیا سرکاری نشریاتی ادارے نے میرٹ کی بنیاد پر نجی چینل کے ساتھ معاہدہ کیا تھا یا کوئی اور مقصد تھا۔

کمیٹی اس نتیجے پر پہنچی کہ پی ٹی وی کے نجی چینل کے ساتھ معاہدہ کرنے کے فیصلے میں اقربا پروری ملوث تھی اور ذرائع کے مطابق اس فیصلے سے قومی خزانے کو بھاری نقصان پہنچا۔

رپورٹ میں کہا گیا کہ بولی لگانے کا عمل ناقص تھا اور شفاف نہیں تھا اس عمل میں پی پی آر اے اور پی ٹی وی کے قوانین کی خلاف ورزی کی گئی۔

ذرائع نے بتایا کہ “مشتبہ” اور “جوڑ توڑ” کے عمل کے ذریعے دیگر کمپنیوں کو بولی کے عمل میں حصہ لینے کا مناسب موقع فراہم نہیں کیا گیا۔

ذرائع کا کہنا ہے کہ اس فیصلے سے قومی خزانے کو بھاری نقصان پہنچا ہے اور حکومت نے قانونی کارروائی کا فیصلہ کیا ہے۔

ذرائع نے رپورٹ کے بارے میں بتایا کہ من پسند کمپنیوں کو ٹھیکے دیئے گئے ،پسندیدہ جماعتوں کو بھی ٹیکس میں چھوٹ دی گئی۔

 وزارت اطلاعات نے شواہد فیڈرل انویسٹی گیشن ایجنسی (ایف آئی اے) کو جمع کرا دیے ہیں اور معاملے کی تحقیقات کے لیے تحقیقات کا آغاز کر دیا گیا ہے۔