وزیراعلیٰ بلوچستان نے کہا ہے کہ کسی کو قانون اپنے ہاتھ میں نہ لینے دیا جائے۔

وزیراعلیٰ بلوچستان میر عبدالقدوس بزنجو نے چاغی میں بلدیاتی الیکشن کے دوران تصادم میں ایک شخص کے جاں بحق ہونے پر افسوس کا اظہار کیا جبکہ وزیراعلیٰ بلوچستان نے جاں بحق شخص کے خاندان سے تعزیت و ہمدردی کا بھی اظہار کیا۔

اس موقع میر عبدالقدوس بزنجو نے انتخابی عمل کے دوران صوبے کے بعض علاقوں میں پر تشدد واقعات کا نوٹس لیا۔

وزیراعلیٰ بلوچستان نے ہدایت کی کہ قانون نافذ کرنے والے ادارے مؤثر حکمت عملی کے ذریعہ ہنگامہ آرائی کرنے والوں سے نمٹیں، کسی کو قانون اپنے ہاتھ میں نہ لینے دیا جائے۔

انہوں نے کہا کہ عوام تحمل اور برد باری کا مظاہرہ کریں جبکہ امن بحال رکھنے کے لئے عوام قانون نافذ کرنے والے اداروں سے تعاون کریں۔

عبدالقدوس بزنجو نے یہ بھی کہا کہ انتخابات صرف آج کے دن ہیں ہم نے تو ہمیشہ ساتھ رہنا ہے، انتخابی امیدوار اپنے حامیوں اور ووٹرز کو پر امن رکھنے کی ذمہ داری ادا کریں۔

وزیراعلیٰ بلوچستان میر عبدالقدوس بزنجو کا مزید کہنا تھا کہ ہمارا صوبہ ہمارا گھر ہے اور گھر کا ماحول بہتر رکھنا گھر کے ہر فرد کی ذمہ داری ہے۔