وزیراعظم شہباز شریف کے معاون خصوصی حنیف عباسی نے سابق وزیر داخلہ شیخ رشید احمد کی وِگ اتار کر لانے والے کو 50 ہزار روپے انعام دینے کا اعلان کیا ہے۔

راولپنڈی میں پریس کانفرنس کرتے ہوئے حنیف عباسی کا کہنا تھا کہ مسجد نبوی کے واقعہ کی پلاننگ عمران خان اور  شیخ رشید نےکی، شیخ رشید کا بھتیجا بھی پلاننگ میں شامل رہا۔

معاونِ خصوصی نے کہا کہ عمران خان کے ایما پر مسجد نبوی ﷺ کے افسوس ناک واقعے کی منصوبہ بندی کی گئی، بدترین دشمن کے سامنے بھی مسجد میں کوئی بات نہیں کرتا۔

ان کا مزید کہنا تھا کہ مسجد نبوی ﷺ میں مریم اورنگزیب، شاہ زین بگٹی کو گالیاں دی گئیں، ان سب لوگوں کے خلاف مقدمہ درج کرکے گرفتار کرنا چاہیے، یہ نواز شریف یا شہباز شریف کی نہیں مدینہ کے تقدس کی بات ہے، اس فعل میں شامل افراد کے خلاف سخت کارروائی ہونی چاہیے۔

حنیف عباسی نے چیلنج دیتے ہوئے کہا کہ شیخ رشید سیاسی مقابلہ کریں، جس حلقے سے شیخ رشید الیکشن لڑیں گے وہاں سے میں بھی لڑوں گا اور مقابلہ کروں گا، یہ جہاں جائیں گے انہیں انڈے اور ٹماٹر پڑیں گے۔

خیال رہے کہ مسلم لیگ (ن) کے رہنما حنیف عباسی کو چار روز قبل وزیراعظم کا معاون خصوصی مقرر کیا گیا تھا۔

حنیف عباسی کی بطور وزیراعظم کے معاون خصوصی تقرری کا نوٹیفکیشن بھی جاری کردیا گیا ہے، جس کے مطابق لیگی رہنما کا عہدہ وفاقی وزیر کے مساوی ہوگا۔