سندھ حکومت کی جانب سے  وفاق سے امتحانات کے دوران بجلی کی لوڈشیڈنگ نہ کرنے کا مطالبہ کیا گیا ہے۔

تفصیلات کے مطابق وزیر جامعات اسماعیل راہو نے وفاقی حکومت سے امتحانات کے دوران بجلی کی لوڈشیڈنگ نہ کرنے کا مطالبہ کیا ہے۔

وزیر جامعات اسماعیل راہو نے کہا کہ سندھ میں گرمی کی لہر شدت اختیار کر چکی ہے اور اسی دوران  طلبہ امتحان دیں گے ، بجلی کی لوڈشیڈنگ نہ کی جائے۔

وزیرجامعات نے کہا کہ کےالیکٹرک کراچی میں امتحانی مراکزکے علاقوں میں لوڈشیڈنگ نہ کرے، امتحانات کے دوران امتحانی مراکز کے اطراف دفعہ 144 نافذ کردی گئی ہے۔

اسماعیل راہو نے کہا کہ امتحانی مراکز کےاطراف الیکٹرانک آلات،  اسکینر پر پابندی ہوگی جبکہ کراچی سمیت  سندھ  بھر کے تمام امتحانی مراکز میں بھئ موبائل فونزپرپابندی ہوگی۔

وزیر جامعات اسماعیل راہو نے مزید کہا کہ امتحانی مراکز میں ممکنہ لوڈشیڈنگ کے دوران جنریٹر اسٹینڈ بائے رکھے جائیں۔

واضح رہے کہ میٹرک امتحانات میں طلباء کو تاحال ایڈمٹ کارڈ کا نہیں مل سکا ہے۔

 کراچی ثانوی تعلیمی بورڈ کے تحت میٹرک کے امتحانات 17 مئی سے شروع ہوں گے جبکہ ہزاروں طلباء کو تاحال ایڈمٹ کارڈ کا اجراء نہ ہوسکا۔

ہزاروں طلباء پریشان ہیں، متعدد سرکاری اسکول بھی تاحال ایڈمٹ کارڈ سے محروم ہیں، والدین اور اسکول کے نمائندے کئی گھنٹوں سے بورڈ آفس میں اتوار کے روز بھی ایڈمٹ کارڈ کے اجراء کے لیے موجود ہیں۔

طلبہ کا کہنا ہے کہ روانہ کل کل کا بول کربلایا جاتا ہے جبکہ  کراچی میٹرک بورڈ انتظامیہ کی جانب سے امسال کمپیوٹرائز ایڈمٹ کارڈ بروقت جاری ہونے کا دعوی کیا گیا تھا۔

بوڑڈ ذرائع کا کہنا ہے کہ ہزاروں طلباء کو تاحال ایڈمٹ کارڈ جاری نہ ہوئے، اتوار کے روز بھی مزید امتحانی فارم جمع کیے جا رہے ہیں، 17 مئی سے کراچی میٹرک بورڈ کے تحت امتحانات میں 3 لاکھ 65 ہزار طلباء شریک ہوں گے۔