قمر زمان کائرہ نے کہا ہے کہ وفاقی حکومت آزاد کشمیر کی تعمیر و ترقی اور عوام کے مسائل کے حل کے لیے ہر ممکن اقدامات کرے گی۔

پیپلز پارٹی آزاد کشمیر کے پارلیمانی ممبرز نے اپوزیشن لیڈر چوہدری لطیف اکبر کی سربراہی میں مشیر آمور کشمیر و گلگت بلتستان قمر زمان کائرہ سے ملاقات کی۔

ملاقات میں آزاد کشمیر کی سیاسی صورتحال پر تبادلہ خیال کیا گیا جبکہ پیپلز پارٹی آزاد کشمیر کے تنظیمی امور پر بھی غور اور مشاورت کی گئی۔

ممبران نے قمر زمان کائرہ کو مشیر امور کشمیر کا منصب سنبھالنے پر مبارکباد دی جبکہ ممبران نے مشیر امور کشمیر کو آزاد کشمیر کے عوام کو درپیش مسائل سے آگاہ کیا۔

پارلیمانی پارٹی نے مقبوضہ کشمیر میں بھارتی بربریت اور ڈیموگرافی تبدیل کرنے کے اقدامات کی مذمت کی۔

 ملاقات میں پارلیمانی ممبرز نے کہا کہ پاکستان اور آزاد کشمیر کے عوام مقبوضہ کشمیر کے عوام کی حق خودارادیت کی حمایت جاری رکھیں گے۔

اس موقع پر قمر زمان کائرہ نے کہا کہ وزیر خارجہ بلاول بھٹو زرداری مسئلہ کشمیر کو دنیا کے تمام فورمز پر بھرپور انداز میں اجاگر کریں گے۔

مشیر برائے آمور کشمیر و گلگت بلتستان قمر زمان کائرہ کاق مزید کہنا تھا کہ وفاقی حکومت آزاد کشمیر کی تعمیر و ترقی اور عوام کے مسائل کے حل کے لیے ہر ممکن اقدامات کرے گی جبکہ مسئلہ کشمیر پر مشاورت کے لیے آزاد کشمیر کی تمام سیاسی جماعتوں کی کانفرنس بلائی جائے گی۔

ملاقات میں چوہدری یاسین،  فیصل ممتاز راٹھور، چوہدری پرویز اشرف، سردار جاوید ایوب، نبیلہ ایوب اور سردار امجد یوسف نے شرکت کی۔