وزیر دفاع نے کہا کہ پاکستان اور مصر کے درمیان خوشگوار تاریخی اور روایتی تعلقات ہیں۔

وزیر دفاع خواجہ محمد آصف سے مصر کے سفیر طارق محمد دہراؤ نے ان کے دفتر میں ملاقات کی جس میں وزیر دفاع نے 14 سے 17 مئی 2022 کو مصر میں ہونے والے 13ویں پاک مصر ایم سی سی اجلاس کے انعقاد پر اطمینان کا اظہار کیا۔

اس موقع پر وزیر دفاع خواجہ محمد آصف نے کہا کہ دونوں ممالک اپنی طاقتیں اکٹھا کر سکتے ہیں اور مشترکہ منصوبوں اور تعاون کے لئے کام کرسکتے ہیں۔

خواجہ محمد آصف نے کہا کہ پاکستان اور مصر کے درمیان خوشگوار تاریخی اور روایتی تعلقات ہیں، ان کے دوطرفہ تعلقات میں زیادہ اعتماد اور باہمی اعتماد موجود ہے۔

وزیر دفاع نے اس بات پر اطمینان کا اظہار کیا کہ مصر اور پاکستان کے درمیان تعلقات تمام شعبوں میں بڑھنے کی بھرپور صلاحیت رکھتے ہیں کیونکہ دونوں ممالک کے مشترکہ اسٹرٹیجک مفادات ہیں۔

خواجہ محمد آصف کا کہنا تھا کہ دونوں ممالک ایک جیسے چیلنجز کا سامنا کرتے ہیں جبکہ امن خوشحالی اور ترقی کی یکساں خواہش رکھتے ہیں۔

انہوں نے کہا کہ دونوں ممالک کے درمیان فوجی تعلقات گزشتہ برسوں کے دوران قابل ذکر رہے ہیں اور سیاسی تبدیلیوں اور یکے بعد دیگرے حکومتی تبدیلیوں سے متاثر نہیں ہوئے ہیں۔

وزیر دفاع خواجہ محمد آصف نے مزید کہا کہ مستقبل کے وژن اور مشترکہ تعاون سے دوطرفہ تعلقات مزید مضبوط ہوں گے۔

ملاقات میں مصر کے سفیر طارق محمد دہراؤ نے نیک تمناؤں کے لئے وزیر دفاع کا شکریہ ادا کیا اور دفاع سمیت باہمی دلچسپی کے تمام معاملات میں پاکستان کے ساتھ مل کر کام کرنے کے لئے اپنی حکومت کے عزم کا اظہار کیا۔