سیاحوں کو معیاری خوارک کی فراہمی حکومت پنجاب کی اولین ترجیح بن کی ہے۔

تفصیلات کے مطابق ڈی جی فوڈ اتھارٹی عید کی چھٹیوں اور ویک اینڈ کے پیش نظر کھانے کی چیکنگ کے لیے مری پہنچ گئے، 2 فوڈ پوائنٹس کی پروڈکشن بند، ناقص خوراک بنانے پر 4 ہوٹلوں کو لاکھوں کے جرمانے عائد کردیے گئے۔

ڈی جی فوڈ اتھارٹی نے مال روڈ، مری ایکسپریس وے، کلڈنہ اور جھیگا گلی میں موجود فوڈ پوائنٹس کی چیکنگ کی اور جھیگا گلی میں معائنے کے دوران سیاحوں کے مسائل بھی سنے۔

مری ایکسپریس وے پر معروف فاسٹ فوڈ ریسٹورنٹ کو زائد المیعاد اشیاء کے استعمال پر بند کر دیا اور نامکمل لیبلنگ اور انتہائی ناقص اجزاء کے استعمال پر معروف بیکری کی پروڈکشن بھی بند کر دی گئی۔

ڈی جی فوڈ اتھارٹی شعیب جدون نے کہا کہ قوانین کی خلاف ورزیوں پر 4 فوڈ پوائنٹس کو بھاری جرمانے عائد کیے گئے ہیں۔

ڈی جی فوڈ اتھارٹی شعیب جدون نے بتایا کہ ایکسپریس وے پر معروف کافی پوائنٹ کو ایک لاکھ 50 ہزار، چائے پوائنٹ کو 50 ہزار روپے جرمانہ کیا گیا ہے۔

انہوں نے مزید کہا کہ وزیر اعلی پنجاب کی ہدایت کے مطابق سیاحتی مقامات پر معیاری اشیاء کی فراہمی پر خصوصی توجہ ہے۔