لاہور ہائی کورٹ نے راجہ ریاض کو اپوزیشن لیڈرتعیناتی کی تصدیق شدہ کاپی پیش کرنے کا حکم دے دیا۔ 

تفصیلات کے مطابق لاہورہائی کورٹ میں اپوزیشن لیڈر قومی اسمبلی راجہ ریاض کے خلاف توہین عدالت کی درخواست پرسماعت ہوئی۔

جسٹس مزمل شبیر اختر نے درخواست پرسماعت کی جس میں وفاقی حکومت سمیت دیگر کو فریق بنایا گیا ہے۔

درخواست گزارنےعدالت کے سامنے مؤقف پیش کیا کہ راجہ ریاض نے سوشل میڈیا پرسپریم کورٹ کے ججز کو تنقید کا نشانہ بنایا ہے۔ راجہ ریاض نے ججز کے خلاف توہین آمیز الفاظ استعمال کیے۔

درخواست میں عدالت سے استدعا کی گئی کہ عدالت راجہ ریاض کے خلاف توہین عدالت کی کارروائی کرے جس پر عدالت نے راجہ ریاض کا اپوزیشن لیڈر تعیناتی کی تصدیق شدہ کاپی پیش کرنے کا حکم دیا۔

دوسری جانب لاہورہائی کورٹ نے وزیراعلٰی حمزہ شہباز کو عہدے سے ہٹانے کی درخواست پر جواب جمع نہ کرانے پر جرمانے کا تحریری حکم جاری کردیا۔

عدالت نے جواب جمع نہ کروانے پر وزیراعلی حمزہ شہباز کو ایک لاکھ روپے جرمانہ عائد کیا۔

تحریری فیصلے میں کہا گیا کہ پنجاب حکومت، ڈپٹی اسپیکر، سیکریٹری پنجاب اسمبلی اور پرنسپل سیکریٹری ٹو گورنر پر بھی ایک لاکھ روپے جرمانہ عائد کیا گیا ہے۔

عدالتی فیصلے کے مطابق جرمانے کی رقم 30 مئی سے قبل لاہورہائی کورٹ بار کے اکاؤنٹ میں جمع کروائی جائے۔