ایڈووکیٹ جنرل پنجاب احمد اویس نے کہا ہے کہ آئین کو توڑو گیا تو ملک بکھر جائے گا۔

ایڈووکیٹ جنرل پنجاب احمد اویس نے پریس کانفرنس کرتے ہوئے واضح کیا کہ یہ پریس کانفرنس اس لئے نہیں کر رہا کہ مجھے خدشہ ہے کہ مجھے عہدے سے ہٹا دیا جائے گا، میں نے خود ہی استعفے کا اعلان کر رکھا ہے لیکن کسی کی خواہش کی وجہ سے آفس نہیں چھوڑوں گا۔

انہوں نے کہا ہے کہ پاکستان کا آئین قائم ہے تو پاکستان قائم رہے گا، اس آئین کو توڑا گیا تو ملک بکھر جائے گا، کسی کی خواہش کو پورا کرنے کیلئے آئین کو کسی کا تابع نہیں بنایا جا سکتا ہے۔

ان کا کہنا تھا کہ پاکستان کا آئین سپریم ہے، پارلیمنٹ، آرمڈ فورسز تمام ادارے، محکمے افراد آئین پاکستان کے خادم ہیں، اپنی خواہشات کو تسکین دینے کیلئے پاکستان کو داؤ پر لگا رہے ہیں۔

ایڈووکیٹ جنرل پنجاب کا کہنا تھا کہ عدلیہ ہی آئین کی محافظ ہے جس نے آئین کے تحفظ کی قسم کھائی ہے اور اگر ایک قومی اسمبلی کیلئے سپریم کورٹ چھٹی والے دن ازخود نوٹس لیتی ہے تو آج اس سے بڑا مسئلہ ہے، آج آئین پر حملہ کیا گیا ہے۔

انہوں نے درخواست کی کہ چیف جسٹس پاکستان خدا کیلئے پاکستان اور آئین کو بچانے کیلئے ازخود نوٹس لیں، کسی فرد کو بچانے کیلئے نہیں بلکہ پاکستان کو بچانے کیلئے اپنے اختیارات کا استعمال کریں۔

 انہوں نے مزید کہا کہ یہ وقت کا تقاضہ ہے کہ پاکستان کا ہر فرد پاکستان کے آئین کی سالمیت اور بقاء کیلئے کھڑا ہو اور اگر کسی کے ذہن میں خناس ہے تو یہ کیڑا اپنے ذہن سے نکال دے۔