حلیم عادل شیخ نے کہا ہے کہ ایک ہزار ایکڑ زمین رکھنے والے چوروں کو پانی کی سہولت دی جارہی ہے۔

قائد حزب اختلاف سندھ حلیم عادل شیخ نے کہا ہے کہ کوٹڑی بیراج ڈاؤن اسٹریم پر نیا نظارہ دیکھا ہے، دریائے سندھ کے بجائے ریگستان کا نظارہ دیکھ کر آیا ہوں۔

انہوں نے کہا کہ آج سندھ بھی انکا ہے، وفاق بھی انکا ہے، پانی کم آرہا ہے، قدرت کی طرف سے کم آرہا ہے، صورتحال یہ ہے کے دریائے سندھ کے کنارے پر بسنے والے لوگ زہریلا پانی پینے پر مجبور ہوگئے ہیں۔

  حلیم عادل شیخ نے کہا ہے کہ کوٹڑی کے لوگ زہریلا پانی پینے پر مجبور ہیں، نارا کینال پر 130 سے زیادہ کنیکشن وڈیروں کے غیرقانونی طور لگے ہیں، زرداری سندھ کا پانی نارا کینال سے چوری کروا رہا ہے۔

قائد حزب اختلاف سندھ نے کہا ہے کہ تمام اضلاع میں زرداری کے وڈیرے بیٹھے ہوئے ہیں، جو پانی چوری میں ملوث ہیں، خورشید شاہ صاحب آپ وفاقی وزیر ہیں تو ٹیل کے آبادگاروں کو پانی نہیں مل رہا وہاں کیوں خاموش ہیں۔

انہوں نے کہا کہ سندھ میں پانی کی قلت سے ٹھٹھہ کے لوگ برباد ہوچکے ہیں، بدین میں لوگ پانی کی قلت کے خلاف سراپا احتجاج ہیں، دس سے پندرہ ایکڑ زمین رکھنے والے کاشتکار پر مقدمات درج ہوررہے ہیں۔

حلیم عادل شیخ نے کہا ہے کہ ایک ہزار ایکڑ زمین رکھنے والے چوروں کو پانی کی سہولت دی جارہی ہے، زرداریوں کو پانی دیا جارہاہے جبکہ غریب پانی کی بوند بوند کو ترس رہے ہیں۔