لاہورکی مقامی عدالت نے بیلف کو پولیس سے مغوی حافظ نوید ایڈووکیٹ کی بازیابی کا حکم دے دیا۔ 

تفصیلات کے مطابق ایڈیشنل سیشن جج ندیم انجم سلیمی نے رانا کاشف کی درخواست پرتحریک انصاف کے کارکن کو پولیس حراست سے بازیاب کرانے کا حکم دیا۔

درخواست گزار نے عدالت کو بتایا کہ حافظ نوید ایڈووکیٹ ہائیکورٹ اور پی ٹی آئی کے کارکن ہیں۔ لانگ مارچ کے اعلان کے بعد کے پولیس نے رات کو حافظ نوید کو اٹھا لیا۔

وکیل درخواست گزار نے مؤقف پیش کیا کہ پولیس نے غیر قانونی طور پرحافظ نوید ایڈووکیٹ کو گرفتار کیا ہے۔ خدشہ ہے کہ پولیس حافظ نوید کو جھوٹے مقدمات میں نامزد نہ کردے۔

دخواست میں عدالت سے یہ بھی کہا گیا کہ خدشہ ہے کہ پولیس جعلی پولیس مقابلے میں حافظ نوید ایڈووکیٹ کو قتل نہ کردے۔ عدالت سے استدعا ہے کہ حافظ نوید ایڈووکیٹ کو پولیس حراست سے بازیاب کرانے کا حکم دے۔

دوسری جانب پی ٹی آئی کے سینیٹراعجازچودھری نے بھی لانگ مارچ معاملے پرگرفتاریوں کیخلاف لاہور ہائی کورٹ میں درخواست دائر کردی۔

درخواست میں صوبائی حکومت اور آئی جی پنجاب و دیگر کو فریق بنایا گیا ہے جس میں مؤقف اختیار کیا گیا کہ پنجاب حکومت کی جانب سے گرفتاریاں کی گئی ہیں۔ لانگ مارچ کے دوران سڑکوں کو بند کیا جا رہا ہے۔

سینیٹراعجازچودھری نے درخواست میں استدعا کی کہ لاہورہائی کورٹ نے تحریک انصاف کے گرفتار کارکنوں کو رہا کرنے کا حکم دیا جائے۔ تحریک انصاف کے گرفتار کارکنوں کو رہا کرنے کا حکم دیا جائے۔