صاف پانی کی کمی کی وجہ سے لوگ پینے کے لئے تو منرل واٹر استعمال کر لیتے ہیں لیکن نہانے کے لیے کھارا پانی استعمال کرنا مجبوری ہے۔

کھارے پانی کی وجہ سے سب سے زیادہ نقصان بالوں کا ہوتا ہے جس کا حل آج ہم آپ کو بتائیں گے۔

کھارے پانی میں نمکیات کی شرح انتہائی زیادہ ہوتی ہے اور یہ پانی ایسے ٹھوس نمکیات سے بھرپور ہوتا ہے جو گھل نہیں سکتے اسی وجہ سے کھارا پانی جسم پر استعمال کرنے سے خارش اور خشکی پیدا ہوتی ہے اور بال روکھے، بے جان اور نمکیات کی زیادتی کی وجہ سے جھڑنے بھی لگتے ہیں۔

یہ پانی اتنا زہریلا ہوتا ہے کہ اس سے مل کر اچھے سے اچھا شیمپو بھی اپنا اثر کھو دیتا ہے۔

اس کے لیے نہانے کے بعد آخری بار جسم کو نتھارنے کے لئے پینے والا صاف پانی استعمال کریں تاکہ کھارے پانی کی نمکیات اچھی طرح نکل جائیں۔

یا پھر ایک بڑا ٹکڑا پھٹکری لیں اور پانی سے بھری ہوئی بالٹی میں کچھ دیر اچھی طرح پھیریں، پھٹکری نمکیات کو پانی سے کاٹ دیتی ہیں جس کے بعد وہ بالٹی کی نچلی سطح پر بیٹھ جاتے ہیں اور اوپر والا پانی صاف ہوجاتا ہے۔

اس کے علاوہ کھارے پانی سے خراب ہوئے بالوں کو ہفتے میں 2 بار بادام یا کھوپرے کے تیل سے مساج کریں اور انڈے دہی کا ماسک بھی لگائیں۔