وزیراعلیٰ پنجاب حمزہ شہباز نے کہا ہے کہ سیف سٹی پراجیکٹ عوام کے جان ومال کے تحفظ کے لئے کلیدی اہمیت رکھتا ہے۔

وزیراعلیٰ پنجاب حمزہ شہباز نے  پنجاب سیف سٹی اتھارٹی کے ہیڈ آفس کا دورہ کیا جہاں انہوں نے ڈیجیٹل کیمروں کے ذریعے شہر میں امن عامہ کی مانیٹرنگ کے انتظامات کا جائزہ لیا۔

وزیر اعلیٰ حمزہ شہباز نے ڈیجیٹل وال پرسی سی ٹی وی کیمروں کے ذریعے مانیٹرنگ نظام کا معائنہ  بھی کیا اور ساتھ ہی تمام کیمروں کو جلد از جلد فنکشنل کرنے کی ہدایت بھی کی ہے۔

اس موقع پر وزیراعلیٰ حمزہ شہباز نے غیر نمونہ نمبر پلیٹ گاڑیوں کے خلاف کارروائی کا حکم دیا اور کہا ہے کہ سٹرکوں پر لین مارکنگ کا کام ترجیحی بنیادوں پر کیا جائے۔

ان کا کہنا تھا کہ لاہور میں سیف سٹی پراجیکٹ کا سہرا مسلم لیگ(ن) کی حکومت کو جاتا ہے جو کہ عوام کے جان ومال کے تحفظ کے لئے کلیدی اہمیت رکھتاہے۔

انہوں نے مزید کہا کہ عوامی اہمیت کے اس منصوبے سے متعلق امور میں مزید تاخیر کسی صورت نہیں ہونی چاہیے۔

اسکے علاوہ وزیر اعلیٰ حمزہ شہباز کی لاہور میں ٹریفک کی مؤثر مینجمنٹ کے لیے سیف سٹی اتھارٹی میں علیحدہ سیل قائم کرنے کی ہدایت کی ہے۔

خیال رہے کہ وزیر اعلیٰ پنجاب کی زیر صدارت پنجاب سیف سٹیز اتھارٹی کے کمیٹی روم میں خصوصی اجلاس بھی منعقد ہوا جس میں حمزہ شہباز کوعوام کے جان و مال کے تحفظ کے لئے کئے گئے اقدامات کے بارے میں بریفنگ دی گئی۔

علاوہ ازیں وزیر اعلیٰ حمزہ شہباز نے پکار 15 کال سینٹر کا بھی وزٹ کیا۔