نوجوان وکٹ کیپر بلے باز محمد حارث اور تیز گیند باز زمان خان اگلے ماہ شروع ہونے والی ویسٹ انڈیز کے خلاف تین میچوں کی ون ڈے سیریز کے لیے اسکواڈ کے اعلان سے قبل مضبوط امیدوار ہیں۔

تفصیلات کے مطابق دونوں کھلاڑیوں نے پاکستان سپر لیگ (پی ایس ایل) میں اپنی شاندار پرفارمنس سے شہرت حاصل کی اور ہر قسم کی صورتحال میں اپنی مہارت کا  مظاہرہ کیا۔

 جہاں محمد  حارث نے دلکش اسٹروکس کھیلے وہیں زمان  خان  نے ڈیتھ اوورز میں شاندار بولنگ کا مظاہرہ کیا۔

لاہور قلندرز کے زمان خان  نے 18 وکٹیں لینے کے بعد اس سال کے پی ایس ایل کے ابھرتے ہوئے کرکٹر کا اعزاز حاصل کیا جبکہ حارث نے پانچ اننگز میں 166 رنز بنائے اور پشاور زلمی کی نمائندگی کرتے ہوئے 186.51 کا شاندار اسٹرائیک ریٹ برقرار رکھا۔

واضح رہے کہ اسکواڈ کا اعلان 23 مئی کو کیے جانے کا امکان ہے اور برطانیہ میں کاؤنٹی چیمپئن شپ میں حصہ لینے والے کھلاڑی مئی کے آخری ہفتے میں شروع ہونے والے تیاری کیمپ کے لیے وطن واپس پہنچ جائیں گے۔