کنگنا نے بالی وُڈ خانز کیساتھ کام سے کیوں انکار کیا، اداکارہ نے وجہ بتادی۔
بھارتی میڈیا رپورٹ کے مطابق بالی وُڈ اداکارہ کنگنا رناوت نے اسکرپٹ میں خواتین کو غیر اہم دکھانے یا ان کے کردار سے انصاف نہ کرنے والی فلموں میں کام نہ کرنے کا انکشاف کیا ہے۔

کنگنا نے ایک انٹرویو کے دوران یہ انکشاف کیا کہ وہ بہت سی ایسی فلمیں ٹھکرا چکی ہیں جس میں صرف مردوں کے کردار کو ہی دکھایا جاتا ہے یا عورتوں کا کردار نہ ہونے کے برابر ہوتے ہیں۔
اداکارہ نے اپنی آنے والی فلم ’ڈاکاڈ‘ کے پوسٹر کی جانب اشارہ کرتے ہوئے کہا کہ ’میرا نظریہ اور سوچ یہ ہے، اسی لیے بالی وُڈ کے خانز اور کمار کے ساتھ بھی کئی فلموں میں کام کرنے سے انکار کر چکی ہوں‘۔

کنگنا رناوت نے کہا کہ میں منصوبہ بندی کیساتھ ایسا نہیں کرتی مگر اپنے نظریے کے تحت چلتی ہوں۔
انہوں نے بتایا کہ ایسے نظریات پر فلموں میں کردار کرنے کے لیے رازنیش، سہیل مکلائی اور دیپک موکٹ جیسے افراد کی ضرورت پڑتی ہے جو ایسے کردار آفر کریں جس میں خواتین کو مرکزی حیثیت ملے۔

اداکارہ کا کہنا تھا کہ اگر ایک عورت کامیاب ہوتی ہے تو اس کی کامیابی کئی مردوں پر منحصر ہوتی ہے۔