ترجمان دفتر خارجہ عاصم افتخار نے کہا ہے کہ بھارتی قابض افواج نے کشمیریوں کے ماورائے عدالت قتل میں اضافہ کر دیا ہے۔

تفصیلات کے مطابق ترجمان دفتر خارجہ عاصم افتخار نے کہا ہے کہ بھارت کے غیر قانونی زیر قبضہ جموں کشمیر میں بھارتی قابض افواج کے ہاتھوں کشمیریوں کے قتل عام میں شدت آگئی ہے۔

انہوں نے کہا کہ گزشتہ روز بھارت کے غیر قانونی طور پر مقبوضہ جموں کشمیر کے پلوامہ ضلع میں دو کشمیری نوجوانوں کے ماورائے عدالت قتل کی شدید مذمت کرتے ہیں، گزشتہ چار دنوں میں 9 کشمیریوں کو شہید کیا گیا اس کی بھی مذمت کرتے ہیں۔

عاصم افتخار نے کہا کہ 5 اگست 2019 کے بعد سے اب تک 609 سے زائد بے گناہ کشمیریوں کو بھارتی قابض افواج نے مظاہروں میں شہید کیا ہے، مقبوضہ جموں کشمیر میں قتل و غارت گری کا سلسلہ بھارت کا کشمیریوں کے خلاف ریاستی دہشت گردی کا واضح مظہر ہے۔

ترجمان دفتر خارجہ نے کہا کہ حریت رہنما یاسین ملک کو متنازعہ مقدمے میں سزا سنائے جانے کے بعد بھارتی قابض افواج نے کشمیریوں کے ماورائے عدالت قتل میں اضافہ کر دیا ہے۔

انہوں نے کہا کہ عالمی برادری مقبوضہ جموں کشمیر میں انسانی حقوق کی سنگین اور منظم خلاف ورزیوں کے لیے بھارت کو جوابدہ ٹھہرائے، بھارت کو اقوام متحدہ کے کمیشن آف انکوائری کو آزادانہ تحقیقات کی اجازت دینی چاہیے۔