وفاقی وزیر اطلاعات مریم اورنگزیب نے کہا ہے کہ پوری دنیا میں پاکستان اور چین کے درمیان قائم دوستی مثالی سمجھی جاتی ہے۔

تفصیلات کے مطابق وفاقی وزیر اطلاعات مریم اورنگزیب نے پاک چین سفارتی تعلقات کے 71 سال مکمل ہونے پر چینی سفارت خانہ کا دورہ کیا اور تقریب سے خطاب پاک چین دوستی کے متعلق اپنے خیالات کا اظہار کیا۔

انہوں نے کہا کہ پاک چین تعلقات نے نہ صرف پاکستان میں معاشی اور انسانی ترقی کی ہے بلکہ علاقائی خوشحالی لانے میں بھی کردار ادا کیا ہے۔

انہوں نے مزید کہا کہ پاکستان اور چین اسٹریٹیجک پارٹنرز ہیں جس کے زیر اثر پاکستان کوچین کے ساتھ مختلف شعبوں میں معاونت حاصل ہے۔

مریم اورنگزیب کا کہنا تھا کہ اقتصادی راہداری سمیت  کئی منصوبے لازوال  دوستی کی مثال ہیں۔

کراچی میں دہشت گردی کے حالیہ واقعے کا حوالہ دیتے ہوئے وفاقی وزیر نے کہا کہ ہم مجرموں کو انصاف کے کٹہرے میں لائیں گے۔