پاکستان کے سابق کپتان شاہد آفریدی کا کہنا ہے کہ اگر انتظامیہ ویسٹ انڈیز کے خلاف آئندہ ون ڈے سیریز کے لیے محمد رضوان کو آرام دینے کا فیصلہ کرتی ہے تو سرفراز احمد کھیلنے کے مستحق ہیں۔

تفصیلات کے مطابق شاہد آفریدی سے جب رضوان کے کام کے بوجھ کے بارے میں پوچھا گیا تو انہوں نے کہا کہ سرفراز دوسرا بہترین آپشن ہے اور اگر انہیں اسکواڈ میں لیا جاتا ہے تو انہیں موقع دیا جانا چاہیے۔

انہوں نے کہا کہ سرفراز  احمد کو موقع دیا جانا چاہیے اگر سلیکشن کمیٹی انہیں سیریز کے لیے منتخب کرتی ہے، اگر رضوان کو آرام دیا جاتا ہے اور سرفراز اسکواڈ میں ہوتے ہیں تو مجھے یقین ہے کہ سرفراز کھیلنے کے لائق ہیں۔

سابق کپتان نے کہا کہ میری رائے میں سرفراز دوسرا بہترین انتخاب ہے اور اگر وہ اسکواڈ کا رکن ہے تو اسے پہلے موقع دیا جانا چاہیے، مجھے یقین ہے کہ ہمیں کسی کھلاڑی کے ساتھ اس سطح کے احترام کے ساتھ پیش آنا چاہیے ۔

شاہد آفریدی نے کہا کہ محمد حارث کے لیے پاکستان سپر لیگ میں شاندار کارکردگی دکھانے کے باوجود بین الاقوامی کرکٹ میں ڈیبیو کرنا تھوڑا جلدی تھا۔

واضح رہے کہ ویسٹ انڈیز کی ٹیم پاکستان میں 8، 10 اور 12 جون کو تین ون ڈے میچز کھیلے گی۔