بالی ووڈ انڈسٹری میں نہایت کم وقت میں نام اور مقام بنانے والے ورسٹائل اداکار سوشانت سنگھ راجپوت کی آج دوسری برسی ہے۔

34 سالہ سوشانت سنگھ راجپوت کی موت نے ایک بار پھر بھارت سمیت دنیا بھر میں ان کے مداحوں کو غمزدہ کردیا ہے اور اداکار ایک بار پھر ٹوئٹر پر ٹاپ ٹرینڈ ہیں۔

 سوشانت سنگھ راجپوت کی دوسری برسی پر اُن کی گرل فرینڈ ریا چکروتی نے اپنے سوشل میڈیا اکاؤنٹ انسٹاگرام پر ایک جذباتی پیغام شیئر کرتے ہوئے لکھا کہ میں تمہیں روز یاد کرتی ہوں۔

واضح رہےکہ سوشانت سنگھ نے  14 جون 2020 کو اپنے فلیٹ پر خود کشی کر لی تھی۔

پولیس نے سوشانت کے اہل خانہ کی درخواست پر بھارتی اداکارہ اور ان کی گرل فرینڈ ریا چکروتی کو بھی شامل تفتیش کیا تھا مگر ان پر قتل کا الزام ثابت نہیں ہو سکا۔

بھارتی پولیس طویل عرصہ شواہد اکٹھے کرتی رہی مگر حتمی نتیجہ نہ نکلا۔

ناقص تفتیش پر کیس بھارتی تحقیقاتی ادارے، سی بی آئی کے حوالے کیا گیا تھا جس کی معاونت کرتے ہوئے آل انڈیاانسٹی ٹیوٹ آف میڈیکل سائنسز کی فرانزک ٹیم نے بتایا کہ سوشانت کے جسم پر کسی زخم کا نشان نہیں تھا نہ ہی ان کے جسم میں شراب کی موجودگی کے شواہد ملے۔

پولیس کو ان کی رہائش گاہ سے ان کے علاج و معالجے کے دستاویزات ملے تھے جس سے اندازہ لگایا گیا کہ وہ ڈپریشن کا علاج کروا رہے تھے۔

اداکار کے قریبی دوستوں کے ذرائع کا کہنا تھا کہ وہ گزشتہ چند ماہ سے ڈپریشن اور ذہنی دباؤ کا شکار تھے، تاہم ان کی پریشانی میں کورونا کے باعث لاک ڈاؤن ہونے کے باعث اضافہ ہوا۔