وفاقی وزارت داخلہ کی جانب سے توانائی بحران سے نمٹنے اور عدالتی وقت بچانے کیلئے قیدیوں کی حاضری ویڈیو لنک کے ذریعے کرنے کا فیصلہ کیا گیا ہے۔

تفصیلات کے مطابق وزارت داخلہ کے فیصلے کے بعد چالان پیش نہ ہونے والے قیدیوں کی حاضری ویڈیو لنک کے ذریعے ہو گی، مقدمے میں شہادت کے لیے قیدیوں کی حاضری یقینی بنائی جائے گی۔

حکومت کے اس اقدام سے ایندھن ٹرانسپورٹیشن اخراجات کم ہوں گے جبکہ اضافی پولیس اہلکاروں کی تعیناتی سے بھی بچا جاسکے گا۔

اس فیصلے کی روشنی میں ویڈیو لنک کے ذریعے حاضری سے قیدیوں کے فرار ہونے کا رسک بھی ختم ہو جائے گا۔

یاد رہے کہ اسلام آباد کی ماتحت عدلیہ کے حوالے سے یہ فیصلے ڈسٹرکٹ کوآرڈینیشن کمیٹی نے کیے ہیں جو کہ پولیس ،جیل خانہ جات حکام اور ججز پر مشتمل  تھی۔

اس حوالے سے سنیئر سپریٹنڈنٹ جیل خانہ جات  کا کہنا ہے کہ قیدیوں کی ویڈیو لنک کے ذریعے پیشی کے لیے بوتھ بھی لگانے کا کام 2 سے 3روز میں مکمل کرلیا جائیگا۔

اس سے قبل وفاقی حکومت کی جانب سے توانائی کی بچت کے لئے غیر معمولی اقدامات کرنے کا فیصلہ کیا گیا ہے۔

اس حوالے سے پیش کردہ تجاویز کے مطابق بڑے شہروں کو اتوار کے دن ‘‘وہیکل فری’’ بنانے سمیت 7 اہم تجاویز شامل ہیں۔

موٹرویز پر صرف ڈرائیور والی کار سے ڈبل ٹول  ٹیکس وصول کرنے اور موٹر ویز اور ہائی ویز پر گاڑیوں کی رفتار کی حد کم کرنے کی سفارش پیش کی گئی ہے۔

صوبوں کو موٹر وہیکلز کی سالانہ انسپکشن کرنے کا پابند کرنے کی سفارش بھی پیش کی گئی ہے۔

تجاویز میں صوبائی زرعی اداروں کو ٹریکٹروں کی ٹیوننگ اور انجن معیار کو چیک کرنے کا پابند کرنے اور دن کے اوقات میں سرکاری اورنجی امور نمٹانے کیلئے سخت پابندی نافذ کرنے کی سفارش دی گئی ہے۔