روڈ ٹو مکہ پراجیکٹ کے تحت 106 پروازوں پر مشتمل حج فلائٹ آپریشن 30 جون تک لگاتار جاری رہے گا، جدہ ایئرپورٹ پر پہلی حج پرواز 16جون کو اترے گی۔

ترجمان مذہبی امور کا کہنا ہے کہ گذشتہ 5  روز میں ساڑھے 8 ہزار عازمینِ حج سعودی عرب پہنچ گئے ہیں اور آج ہفتہ کے روز 5 حج پروازوں سے 15 سو سے زائد  عازمینِ حج مدینہ منورہ پہنچائے جائیں گے۔

ترجمان کے مطابق عازمینِ حج  کو مدینہ منورہ میں 8 روزہ قیام کے بعد مکہ مکرمہ روانہ کیا جائے گا اور حج سے قبل 17 ہزار عازمینِ حج مدینہ منورہ کی زیارت مکمل کریں گے۔

حج کے بعد پاکستان روانگی سے 8 دن قبل باقی 15 ہزار عازمینِ حج کو مدینہ منورہ پہنچایا جائے گا۔

مدینہ منورہ ایئرپورٹ پر مذہبی امور کا عملہ عازمین حج کی رہنمائی کیلئے 24 گھنٹے شفٹوں میں کام کر رہا ہے جبکہ روڈ ٹو مکہ پراجیکٹ کی بدولت عازمین حج کی سعودی ایئرپورٹ پر بغیر پریشانی تیز ترین کلیئرنس بھی دی جارہی ہے۔

پاکستانی حج میڈیکل مشن  کے تحت سعودی ایرپورٹس اور رہائشی سیکٹرز میں ڈسپنسریاں قائم  کر دی گئیں ہیں جبکہ پولیس ، 1122اور سول اداروں کے ملازمین  بطور معاونین رہائش، خوراک اور ٹرانسپورٹ کا انتظام سنبھال رہے ہیں۔

شعبہ گمشدگی، ہیلپ لائن، حرم گائڈز، مانیٹرنگ ،مکہ روانگی کا انتظام مذہبی امور کے ویلفیئر اسٹاف کے ذمہ ہے۔