وزیراعظم کی زیر صدارت جاری کابینہ اجلاس کے دوران وزراء کی جانب سے بڑھتی ہوئی مہنگائی اور اس حوالے سے دیئے جانے والے بیانات پر برہمی کا اظہار کیا گیا ہے۔

اس حوالے سے ذرائع کا کہنا ہے کہ اجلاس کے دوران وزراء کی جانب سے مؤقف پیش کیا گیا کہ عوام پہلے کی مہنگائی کی چکی میں پس رہی ہے ایسے میں پیٹرولیم مصنوعات سمیت بجلی و گیس کی قیمتوں میں مزید اضافہ کرنا ظلم ہوگا۔

وزراء کی جانب سے زور دیا گیا کہ تیل کی قیمتیں بڑھانے کی بجائے دوسرے شعبوں سے ایڈجسٹمنٹ کی جائے۔

دوسری جانب وزیراعظم نے بھی اپنے خیالات کا اظہار کرتے ہوئے کہا کہ وہ بھی قیمتوں میں مزید اضافے کے حق میں نہیں ہیں۔

اجلاس کے دوران وزیر خزانہ مفتاح اسماعیل کی جانب سے رائے کا اظہار کرتے ہوئے کہا گیا کہ اگر قیمتیں نہ بڑھائیں تو آئی ایم ایف پیسے نہیں دے گا اور آئی ایم ایف نے واضح کہا ہے کہ سبسڈی ختم نہ کی تو قسط جاری نہیں ہوگی۔