وزیر خزانہ نے کہا ہے کہ مقامی پیداوار میں اضافے کے لئے ضروری اقدامات کئے جائیں۔

وزیر خزانہ مفتاح اسماعیل کی زیر صدارت خوردنی تیل کی دستیابی سے متعلق کمیٹی کا اجلاس ہوا جس میں مستقبل کی ضروریات اور خوردنی تیل کی درآمد کے حوالے سے تجاویز پر غور کیا گیا۔

اجلاس میں خوردنی تیل کی درآمد کے زرمبادلہ کے ذخائر پر پڑنے والے اثرات پر بھی روشنی ڈالی گئی جبکہ سپلائی چین پر عالمی دباؤ کے تناظر میں اجناس کی دستیابی کو یقینی بنانے کی بھی تجویز دی گئی۔

اجلاس میں وفاقی وزراء سید مرتضیٰ محمود، رانا تنویر حسین، سیکرٹری صنعت و پیداوار، چیئرمین ایف بی آر اور سینئر افسران نے شرکت کی۔

اجلاس میں وزیر خزانہ مفتاح اسماعیل کو بریفنگ دیتے ہوئے کہا گیا کہ ملک میں خوردنی تیل کا وافر ذخیرہ موجود ہے۔

بریفنگ دیتے ہوئے کہا گیا کہ عالمی سطح پر خوردنی تیل کی قیمتوں میں اضافہ ہو رہا ہے، عالمی قیمتوں کے پاکستان کے تجارتی بل پر نمایاں اثرات مرتب ہوں گے۔

وزیر خزانہ نے ملائیشیا اور انڈونیشیا سے خوردنی تیل کی درآمد کے عمل کو تیز کرنے کی ہدایت دی جبکہ وزیر خزانہ خوردنی تیل کی قیمتوں میں استحکام کیلئے ضروری اقدامات کی بھی ہدایت دی۔

وزیر خزانہ مفتاح اسماعیل نے اجلاس کی صدارت کرتے ہوئے کہا کہ مقامی پیداوار میں اضافے کے لیے ضروری اقدامات کئے جائیں، مقامی انتظام سے زرمبادلہ کے ذخائر پر پڑنے والے اثرات کو کم کیا جا سکے گا۔