بھارتیہ جانتہ پارٹی (بی جے پی) کی ترجمان نوپور شرما اور نوین کمار جندال کی طرف سے پیغمبر اسلام پر دیے گئے متنازع بیان کے خلاف سوشل میڈیا پر مسلمانوں کی جانب سے شدید رد عمل ظاہر کیا جارہا ہے۔

بی جے پی کی ترجمان نوپور شرما کے گستاخانہ بیان پر پاکستان کے نامور مذہبی اسکالر مولانا طارق جمیل نے بھی شدید مذمت کی ہے۔

مولانا طارق جمیل نے سماجی رابطے کی ویب سائٹ ٹوئٹر پر جاری اپنے پیغام میں اس واقعے کے حوالے سے بات کرتے ہوئے کہاکہ نبی کریم ﷺ کی شان میں سرعام گستاخی انتہائی قابل مذمت ہے۔

انہوں نے کہا کہ ایسی حرکتیں مسلمانوں کے جذبات کو ٹھیس پہنچانے کے لیے ہر تھوڑے عرصے میں کہیں نا کہیں کی جاتی ہیں، امتِ مسلمہ کو یک زبان ہو کر ایسے گستاخانہ اقدامات کی عالمی سطح پر بھرپور مذمت اور آواز اٹھانی چاہیے۔

واضح رہے کہ بی جے پی ترجمان نوپور شرما نے ایک ٹی وی چینل پر اسلام اور پیغمبرِ اسلام حضرت محمدﷺ کی شان اقدس میں گستاخانہ گفتگو کی تھی۔

سوشل میڈیا صارفین کی جانب سے بھی بی جی پے رہنما کے اس اقدام پر کڑی تنقید کی جارہی ہے اور بھارتی میڈیا کی رپورٹس کے مطابق نوپور شرما کی پارٹی رکنیت ختم کردی گئی ہے۔

  یہ بھی پڑھیں: اس مشکل وقت میں حکومت عوام کیساتھ کھڑی ہے، ریحام خان