وفاقی وزیر خزانہ مفتاح اسماعیل نے دعویٰ کیا ہے کہ آئی ایم ایف پروگرام چند دنوں میں بحال ہوجائے گا۔

پارلیمنٹ ہاؤس میں صحافیوں سے غیر رسمی گفتگو کرتے ہوئے وزیر خزانہ مفتاح اسماعیل نے یہ امید ظاہر کی کہ عالمی مالیاتی فنڈ (آئی ایم ایف) کا پروگرام ایک آدھ دن میں بحال ہوجائے گا۔

ایک سوال کے جواب میں انہوں نے کہا کہ آئی ایم ایف کو ملازمین کی تنخواہوں میں اضافے پر کوئی اعتراض نہیں اور اسے 12 لاکھ آمدن پر اِنکم ٹیکس چھوٹ پر بھی اعتراض نہیں ہے۔

وفاقی وزیر خزانہ نے کہا کہ غریب طبقے کو ریلیف دیا جائے گا اور امیروں پر ٹیکس لگے گا، آئی ایم ایف پروگرام کا تنخواہ بڑھانے سے کوئی تعلق نہیں ہے، ہماری طرف سے دی گئی 12 لاکھ سالانہ آمدنی پر انکم ٹیکس کی چھوٹ برقرار رہے گی۔

انہوں نے کہا کہ وزیراعظم شہباز شریف ٹیکس بڑھانے پر ناراض ہوجاتے ہیں، وہ باربار ٹیکس کم کرنے پر زور دے رہے ہیں، وزیراعظم سے کہتا ہوں کہ اگر ٹیکس نہ بڑھاوٴں تو آمدنی کیسے بڑھے گی۔

مفتاح اسماعیل نے انکشاف کیا کہ گزشتہ مالی سال صرف 14 سے پندرہ کلوگرام سونا قانونی طریقے سے پاکستان آیا جب کہ ہر سال 80 ٹن سونا ملک میں اسمگلنگ سے آ رہا ہے۔

ابھی تو اور بھی جیبیں کاٹنی ہیں، مفتاح اسماعیل

بعد ازاں سلیم مانڈوی والا کی زیر صدارت سینیٹ کی قائمہ کمیٹی برائے خزانہ کا اجلاس ہوا جس میں وزیرخزانہ مفتاح اسماعیل اور سابق وفاقی وزیر خزانہ شوکت ترین بھی موجود تھے۔

اجلاس کے دوران مفتاح اسماعیل اور شوکت ترین کے درمیان دلچسپ مکالمہ بھی ہوا۔ کمیٹی ممبران نے وزیر خزانہ سے کہا کہ وہ  غریبوں پر ٹیکس عائد کرنے سے اجتناب کریں۔

جس پر چیئرمین کمیٹی سلیم مانڈوی والا نے کہا کہ تین سو سے اوپر جس کا ایک بھی ہندسہ جاتا ہے تو اسے ساری مالیت پر ٹیکس دینا ہوگا۔

مفتاح اسماعیل نے کہا کہ آپ کی بات میں وزن ہے لیکن پیسوں کی بہت ضرورت ہے۔

شوکت ترین نے کہا کہ آپ غریبوں کے بجائے کسی اور کی جیب کاٹیں جس پر وزیر خزانہ مفتاح اسماعیل نے کہا کہ وہ بھی کاٹیں گے آپ بے فکر رہیں۔