روسی سفیر کے بیان کا معاملے پر پاکستان پیپلزپارٹی نے سابق وزیراعظم عمران خان سے عوام سے معافی مانگنے کا مطالبہ کیا ہے۔

پیپلزپارٹی کے سینیٹر و نو منتخب چیف ویپ سلیم مانڈوی والا نے روسی سفیر کے بیان کے متعلق اپنے جاری کردہ بیان میں کہا کہ روسی سفیر کا بیان انتہائی اہم ہے جس نے کئی سوال اٹھا دیئے ہیں۔

انہوں نے کہا کہ روسی سفیر کے بیان سے عمران خان کا عوام سے بولا گیا جھوٹ پکڑا گیا ہے، تحریک انصاف کئی ماہ سے روس سے سستا تیل لینے سے متعلق جھوٹ بولتی رہی۔

پیپلزپارٹی کے سینیٹر کا کہنا ہے کہ روسی سفیر نے واضح کردیا کہ عمران خان کے ساتھ گندم اور سستے تیل سے متعلق کوئی معاہدہ نہیں ہوا۔

سلیم مانڈوی والا نے مزید کہا کہ روسی سفیر کے بیان نے عمران خان کے جھوٹے دعوں کا پول کھول دیا ہے، عمران خان بڑے پن کا مظاہرہ کرتے ہوئے جھوٹ بولنے پر عوام سے معافی مانگیں۔

گزشتہ روز پاکستان میں روسی سفیر ڈینئل  گنیش نے عمران حکومت سے متعلق بڑا انکشاف کیا تھا۔

نجی نیوز چینل کو انٹرویو میں روسی سفیر ڈینئل گنیش نے کہا تھا کہ دورہ روس عمران خان حکومت کے گرنے کی وجہ بنی۔

انکا کہنا تھا کہ عمران خان کا ماسکو میں ہونا اور یوکرین پر حملہ ایک اتفاق ہے، اگر عمران خان کو پتا ہوتا تو اس دن کبھی نہ آتے، عمران خان بنیادی طور پر ایک ایماندار آدمی ہے اور وہ اپنے لوگوں کی بہتری چاہتے ہیں۔

روسی صدر ولادیمیر پیوٹن کا بیماری میں مبتلا ہونے سے متعلق سوال پر ڈینئل گنیش نے کہا کہ صدر پیوٹن خیریت سے ہیں اور اپنے کام کر رہے ہیں، میں مغربی میڈیا کی روس کے حوالے سے خبروں پر کبھی یقین نہیں کرتا۔

روس اور یوکرین جنگ کے حوالے سے سوال پرروسی سفیر نے کہا کہ روس کو نیٹو کی نقل و حرکت پر تشویش تھی، ہمارے بارڈر پر نیٹو کی نقل و حرکت یوکرین جنگ کی وجہ بنی۔