بیرسٹر سیف نے کہا ہے کہ لمپی اسکن کے کیسز سامنے آنے کے بعد ابتک 1 لاکھ جانوروں کو ویکسین لگا چکے ہیں۔

وزیراعلیٰ خیبرپختونخوا کے معاون خصوصی برائے اطلاعات وتعلقات عامہ بیرسٹر محمد علی سیف نے مویشیوں میں لمپی اسکن کی روک تھام کے حوالے سے اقدامات کی تفصیلات بیان کرتے ہوئے کہا کہ لمپی اسکن کے کیسز سامنے آنے کے بعد انتظامیہ و ویٹرنری ٹیم  کی مدد سے ابتک 1 لاکھ جانوروں کو ویکسین لگا چکے ہیں۔

انہوں نے کہا کہ خیبرپختونخوا میں لمپی اسکن کا پہلا کیس 22 اپریل 2022 کو ڈی آئی خان میں رپورٹ ہوا، لمپی اسکن کی روک تھام کے لیے لمپی اسکن ڈزیز موبائل ایپ بھی متعارف کرائی گئی ہے۔

   بیرسٹر سیف نے کہا ہے کہ موبائل ایپ کے ذریعے عوام مویشیوں میں لمپی اسکن ڈیزیز کی شکایت درج کر سکتی ہے جس پر فیلڈ اسٹاف کی ٹیمیں موقع پر پہنچ کر مویشیوں کو ویکسین لگائے گی۔

وزیراعلیٰ خیبرپختونخوا کے معاون خصوصی برائے اطلاعات وتعلقات عامہ نے کہا کہ لمپی اسکن ڈیزیز ویکسینیشن کے لئے 150 فیلڈ اسٹاف کو ٹرین کیا گیا ہے جو موقع پر پہنچ کر مویشیوں کی ویکسینیشن کریں گے۔

انہوں نے کہا کہ محکمہ لائیو اسٹاک نے مویشیوں میں لمپی اسکن کی روک تھام کے لیے پرونشل ٹاسک فورس بھی قائم کی ہے، بین الاضلاعی اور بین الصوبائی سرحدوں پر 56 چیک پوسٹیں قائم کی گئی ہیں جہاں پر جانوروں کی ویکسینیشن جاری ہے۔

 بیرسٹر سیف نے کہا ہے کہ بین الاضلاعی 30 اور بین الصوبائی 26 ویکسین چیک پوسٹس قائم کی گئی ہیں۔