قومی کرکٹ ٹیم کے سابق مایہ ناز آل راؤنڈرعبدالرزاق نے کہا ہے کہ ٹی ٹوئنٹی ورلڈکپ 2009 کی فتح کے بعد ہم جس ریسٹورنٹ پر بھی کھانا کھانے گئے تھے لوگ ہم سے پیسے نہیں لیتے تھے۔

تفصیلات کے مطابق پاکستان کرکٹ بورڈ(پی سی بی) کی جانب سے ایک ویڈیو شیئرکی گئی جس میں عبدالرزاق نے کہا کہ 2009 کا ٹی ٹوئنٹی ورلڈ کپ جیتنا  میرے لیے باعث فخر تھا۔

سابق آل راؤنڈر نے کہا کہ  فائنل میچ سے قبل شاہد آفریدی اور میں بات کر رہے تھے کہ 1999 کے ورلڈکپ میں ہمیں اسی میدان میں شکست ہوئی تھی،آج وہی میدان ہے وہی لوگ ہیں ہمیں اس ایونٹ کو جیتنا چاہئے  اور جتنا ہم سے ہو سکے ہم کریں گے۔

انہوں نے کہا کہ جس طرح شاہد آفریدی نے  نیوزی لینڈ کے خلاف ناممکن کیچ لیا اس سے پوری ٹیم کی حوصلہ افزائی ہوئی اورہم نے اپنی فتوحات کا سلسلہ جاری رکھا۔

یہ بھی پڑھیں:ٹی ٹوئنٹی ورلڈکپ 2009،لارڈز کے تاریخی میدان میں شاہینوں کی اڑان

انہوں نے یہ بھی بتایا کہ ہمارے کپتان یونس خان نے کہا کہ پاکستان کو آئی سی سی ایونٹ جیتے ہوئے 17 سال گزر گئے ہیں،ہمارے پاس یہ اچھا موقع ہے کہ ہم اس ٹی ٹوئنٹی ورلڈکپ کو جیتیں۔

سابق آل راؤنڈر  عبدالرزاق نے مزید کہا کہ شاہد آفریدی اور سعید اجمل کی جوڑی بہت اچھی تھی،دونوں وکٹیں بھی نکالتے تھے اور رنز بھی کم دیتے تھے ،ان دونوں کے علاوہ جس طرح عمر گل 4 اوورز کرتے تھے اور اہم وکٹیں نکالتے تھے ان کااس فتح میں اہم کردار تھا۔