وزیراعلیٰ سندھ سید مراد علی شاہ کی جانب سے پی ٹی آئی چیئرمین عمران خان کو مشورہ دیا گیا ہے کہ وہ آئین پر چلنا سیکھیں۔

احتساب عدالت کے باہر میڈیا سے بات چیت کرتے ہوئے وزیراعلیٰ سندھ نے کہا کہ عمران خان کو اپنی نا اہلی اور ناکامی نظر نہیں آتی ہے۔

مراد علی شاہ نے کہا کہ عمران خان کو چاہیئے کہ وہ  آئین پر چلنا سیکھیں اور آئین کے مطابق دیکھیں کون حکمران ہے۔

انہوں نے کہا کہ جب میں عمران خان کو سندھ کی ناانصافی کا بتاتا تھا تو انکو بلکل سمجھ نہیں آتی تھی، انکو آئین کی باتوں سے چڑھ تھی۔

انہوں نے مزید کہا کہ پہلے صدر پاکستان رات بارہ بجے آرڈیننس جاری کرتے تھے اور اب پارلیمنٹ کے مشترکہ اجلاس میں منظور ہونیوالا بل بھی صدر پاکستان کے پاس ہے جو انہوں نے منظور نہ بھی کیے تو یہ قانون ضرور بنیں گے۔

مراد علی شاہ کا کہنا تھا کہ عارف علوی کسی ایک شخص کی بجائے پارلیمنٹ کی مرضی سے چلیں اور صدر مملکت بن کر دکھائیں۔

ان کا کہنا تھا کہ ہماری حکومت کو آئے ڈھائی ماہ کا عرصہ گزرا ہے اور یہ وقت بہت مشکل ہے، کل بھی وزیر خزانہ مشکل سے اسکا اعلان کررہے تھے۔

انہوں نے کہا کہ مستقبل کے لیے کچھ مشکل فیصلے لینے ہوں گے، ہمیں اِنکم اور اخراجات کو کہیں نہ کہیں مینج کرنا ہو گا۔

انہوں نے کہا کہ سیاسی انتقام کا نشانہ بنانے کیلئے ہمارے خلاف ریفرنس بنایا گیا جس میں اب تک 22 پیشیاں ہوئی ہیں اور ایک پیشی پر 17لاکھ روپے خرچ ہوتے ہیں جبکہ وکلاء کی فیس سمیت پیشیوں پر کروڑوں روپے آتے ہیں۔

وزیراعلیٰ سندھ نے کہا کہ کسی سرکاری افسر پر کوئی الزام نہیں ہے لیکن جن لوگوں کا نقصان ہورہا ہے اس کا احتساب ضرور ہوگا ۔

انہوں نے کہا کہ پلانٹ سستی بجلی دے رہا ہے جس سے کے الیکٹرک بجلی لیتی ہے۔