سردار شاہ نے کہا ہے کہ پیپلز پارٹی نے تمام اضلاع میں بلدیاتی انتخابات میں کلین سوئپ کیا ہے۔

صوبائی وزیر تعلیم سردار شاہ نے سندھ اسمبلی اجلاس میں اظہار خیال کرتے ہوئے کہا ہے کہ پیپلز پارٹی نے تمام اضلاع میں بلدیاتی انتخابات میں کلین سوئپ کیا ہے، ایک دن مختص کیا جائے جس میں ایجوکیشن پر ایک روڈ میپ بنائیں۔

انہوں نے کہا کہ آج تک کسی نے نہیں پوچھا ایجوکیشن منسٹری کیوں قائم کی ہے، ہمارے 40 ہزار اسکولز ہیں، 50 ہزار غیر فعال اسکولز ہیں، وہ اسکول ہمارے گلے میں آگئے ہیں۔

سردار شاہ نے کہا ہے کہ ایک ایک گاؤں میں 20 ، 20 اسکولز ہمارے گلے میں پڑے ہیں، ان کا بوجھ خزانے پر پڑ رہا ہے، 36 لاکھ ہمارے اسکولوں میں انرولمنٹ ہے، 47 ہزار سیٹوں پر ساڑھے تین ہزار پاس ہوئے، 45 لاکھ بچے آج بھی کے پی کے میں اسکولوں سے باہر ہیں۔

صوبائی وزیر تعلیم نے کہا کہ ابھی جو اساتذہ بھرتی ہورہے ہیں ان میں ایک بھی سفارش پر نہیں ہے، ضلع جنوبی میں 0.8 فیصد پاس ہوئے، ہمارے 11 ہزار اسکولز جو بند تھے وہ یکم اگست سے کھل جائیں گے، وہاں اساتذہ کی کمی تھی اس لیے بند تھے۔

انہوں نے کہا کہ ساڑھے سات سو میوزک ٹیچر بھرتی کیے جائیں گے، یکم اگست تک اسکولز میں فرنیچر بھی پہنچ جائے گا، 41 ہزار پرائمری اسکولز ہیں، 65 لاکھ بچے اسکولز سے باہر نہیں ہیں، 40 سے 45 لاکھ کا فگر ہے۔

سردار شاہ نے کہا ہے کہ ہمیں پوسٹ پرائمری کا نمبر بڑھانا ہے، ایک ہزار اسکولز اس وقت آپ گریڈ کرسکتے ہیں، اس سے زیادہ موجودہ بجٹ میں نہیں کرسکتے ہیں، ٹیکس آپ جمع نہیں کرسکے، آپ نے ملک کا بیڑہ غرق کردیا ہے۔

صوبائی وزیر تعلیم نے کہا کہ ہمارا ٹارگٹ 5 ہزار اسکولوں کو اپ گریڈ کرنا ہے، بچوں کو اسکولوں میں رکھنا چاہتے ہیں، ہمارے پاس کوئی بھی سائنس میوزیم نہیں ہے، صرف اسلام آباد میں سائنس میوزیم ہے۔