بالی ووڈ کے فلم ساز اور میزبان کرن جوہر اپنے مقبول پروگرام ’’کافی ود کَرن‘‘ کے ساتھ دوبارہ جلوہ گر ہونے والے ہیں۔

غیر ملکی خبر رساں ادارے کے مطابق بالی ووڈ اداکار رنبیر کپور نے اُنہیں پہلے ہی منع کردیا ہے کہ انہیں پروگرام میں مدعو نہ کیا جائے۔

اس حوالے سے کرن جوہر نے بتایا کہ رنبیر کپور کا کہنا ہے مجھے تمہارے پروگرام میں آنے کی بھاری قیمت چکانا پڑتی ہے، مجھے اپنے ساتھ ایسا نہیں کرنا چاہیے، پلیز مجھے اپنے شو میں نہیں بلانا۔

یاد رہے کہ2017 کے اوائل میں بھی رنبیر کپور نے ’’کافی ود کرن‘‘ کے متعلق کچھ ایسی ہی بات کہی تھی۔

انہوں نے ایک پوڈکاسٹ میں کہا تھا کہ اس سیزن (2017) میں مجھے زبردستی بلایا گیا۔

اداکار رنبیر نے بتایا کہ میں نے کرن کو منع کیا تھا کہ میں نہیں آنا چاہتا۔

رنبیر کپور کا مزید کہنا تھا کہ کرن ہمارے ذریعے پیسے بنا رہا ہے۔

انہوں نے کہا کہ ہم یہاں ایک بار آتے ہیں اور پھر سال بھر ہماری باتوں کی وجہ سے ہم پر تنقید ہوتی ہے۔

’’تاہم کافی ود کرن‘‘ میں فلمساز کرن جوہر بالی ووڈ میں متعارف ہونے والے نئے ستاروں یا نئی ریلیز ہونے والی فلم کے اداکاروں کو بات چیت کے لیے مدعو کرتے ہیں۔

واضح رہے کہ پروگرام کی مقبولیت کی وجہ یہ ہے کہ یہاں اکثر فلمی شخصیات نہایت حیران کن انکشافات اور منفرد رائے کا اظہار خیال کرتی ہیں جو بعد ازاں پورے میڈیا کی زینت بن جاتی ہیں۔