ملتان ویسٹ منیجمنٹ کمپنی نے عیدالاضحیٰ کے لئے گرینڈ صفائی پلان کی تیاریاں تیز کردی ہیں۔

سی ای او محمد فاروق ڈوگر نے کمپنی کے تمام ڈیپارٹمنٹس کو متحرک ہونے کی ہدایت دے دی ہے۔

ذرائع کے مطابق ہدایات عیدالاضحیٰ انتظامات کے جائزہ اجلاس میں جاری کی گئی ہیں۔

محمد فاروق ڈوگر نے اجلاس میں گفتگو کرتے ہوئے کہا کہ عیدالاضحیٰ کے موقع پر صفائی کے مثالی انتظامات کئے جائیں گے، ہر ڈیپارٹمنٹ کا سربراہ عید پلان پر 100 عملدر آمد کرنے کا ذمہ دار ہوگا۔

سی ای او کا کہنا ہے کہ پروکیورمنٹ کمیٹی نے رینٹل مشینری اور آئٹمز کی خریداری کے بارے میں تشخیصی رپورٹ دے دی ہے اور عید پلان کی حتمی منظوری حاصل کرنے کے بورڈ آف ڈائریکٹرز کے اجلاس کے لئے درخواست کردی ہے۔

انہوں نے مزید کہا کہ عید پلان کی منظوری کے لئے تمام رولز پر عمل کیا جارہا ہے، عید قربان کے موقع پر اہلیان ملتان کو صاف ستھرا اور خوشگوار ماحول فراہم کیا جائے گا۔

واضح رہے کہ اجلاس میں کمپنی سیکرٹری کبیر خان، چیف انٹرل آڈیٹر آصف طاہر، منیجرز ساجد ریاض، عقیل احمد اور آصف شبیر نے شرکت کی۔

اس موقع پر ڈپٹی منیجرز آپریشنز انوار الحق، عثمان خورشید، حبیب اللہ ظفر اور بلال بھٹہ بھی موجود تھے۔