بھارت کے مقبوضہ کشمیر سے تعلق رکھنے والے فاسٹ بالر عمران ملک نے اپنے ایک انٹرویو میں کہا کہ بیٹسمینوں کی آنکھوں میں خوف دیکھ کر مزہ آتا ہے۔

تفصیلات کے مطابق آئی پی ایل 2022 میں عمران ملک اپنی تیز بالنگ کی وجہ سے کافی سرخیوں میں رہے ۔ انہیں اس آئی پی ایل کی سب سے بڑی کھوج مانا جا رہا ہے۔

اس آئی پی ایل کی تیز گیند بھی عمران ملک نے پھینکی تھی۔ تب سے ہر کوئی جموں کے اس نوجوان فاسٹ بالر کی بات کر رہا ہے۔

آئی پی ایل کے اس سیزن میں عمران نے اپنی بولنگ کی رفتار سے کئی بلے بازوں کو چونکا دیا۔ اب یہ گیند باز جنوبی افریقہ کے خلاف ٹی ٹوئنٹی سیریز میں نظر آئے گا۔

پچھلے آئی پی ایل سیزن میں، عمران ملک نے اپنی گیند کی رفتار سے میتھیو ویڈ اور ہاردک پانڈیا جیسے تجربہ کار جارحانہ بلے بازوں کو بھی پریشان کیا۔

گجرات ٹائٹنز کے کپتان ہاردک پانڈیا کو بھی عمران نے اپنی رفتار اور اچھال سے پریشان کیا۔

بھارتی میڈیا سے باتیں کرتے ہوئے عمران نے بتایا کہ انہیں بیٹسمینوں کی آنکھوں میں فاسٹ بالرز کا خوف دیکھ کر مزہ آتا ہے۔

عمران نے کہا، ‘مجھے تیز گیند پھینکتے ہوئے وکٹیں لینے میں سب سے زیادہ مزہ آتا ہے اور جب بیٹسمین ڈرتا ہے تو مجھے لگتا ہے کہ میں تیز بالنگ کر رہا ہوں اور میں اس میں اچھا ہوں، اسی لیے بیٹسمین مجھ سے ڈرا ہوا ہے۔’

عمران نے بتایا کہ وہ اس وقت خوشی محسوس کرتے ہیں جب ان کی تیز رفتار گیند بیٹسمین کے ہیلمٹ سے ٹکرا جاتی ہے اور سب سے زیادہ خوشی اچھی یارکر گیند پر وکٹ حاصل کرنے سے ہوتی ہے۔

عمران نے اس آئی پی ایل کے 14 میچوں میں 22 وکٹیں حاصل کیں۔ انہیں اس بہترین کارکردگی کا صلہ بھی ملا اور سلیکٹرز نے انہیں افریقہ کے خلاف ٹی ٹوئنٹی سیریز میں ٹیم میں جگہ دی ہے۔