حافظ نعیم الرحمان نے کہا ہے کہ عارضی اور وقتی کام ہمارے نوجوانوں کا مقدر نہیں ہو سکتا۔

امیر جماعت اسلامی کراچی حافظ نعیم الرحمان نے الخدمت کے بنو قابل پروجیکٹ کی تعارفی تقریب سے خطاب کرتے ہوئے کہا ہے کہ الخدمت کا بنو قابل پروجیکٹ نوجوانوں کو خود انحصار بنانے کی جانب پہلا قدم ہے۔

انہوں نے کہا کہ بنو قابل پروجیکٹ کا مقصد نوجوانوں کو اپنی فیملی اور ملک و قوم کے لیے مفید بنانا ہے، کراچی میں لاکھوں نوجوانوں کے لیے سرکاری ملازمتوں کے دروازے بند ہیں۔

حافظ نعیم الرحمان نے کہا ہے کہ تعلیمی قابلیت کے مطابق مناسب ملازمتیں نہ ملنے کی وجہ سے نوجوان معمولی کام کرنے پر مجبور ہیں، عارضی اور وقتی کام ہمارے نوجوانوں کا مقدر نہیں ہو سکتا۔

امیر جماعت اسلامی کراچی نے کہا کہ بنو قابل پروجیکٹ میں ابتدائی تین اور چھ ماہ کے مختلف کمپیوٹر کورسز متعارف کروائے جائیں گے، بنو قابل پروجیکٹ کے تحت مختلف کورسز کرنے والے نوجوان اپنا روزگار خود پیدا کرنے کے قابل بن جائیں گے۔

انہوں نے کہا کہ سوسائٹی میں روزگار کے مناسب مواقع نہ ہونے کی وجہ سے نوجوان نا پسندیدہ سرگرمیوں میں مبتلا ہو جاتے ہیں، نوجوانوں کو مختلف اسکل سکھا کر ہنر مند بنانا ریاست کا کام ہے لیکن وہ مکمل لا تعلق ہے۔

حافظ نعیم الرحمان نے کہا ہے کہ ریاست نہ سڑکیں بنا رہی ہے نہ ٹرانسپورٹ کا نظام فراہم کر رہی ہے، صوبائی حکومت 14سال میں 200 بسیں لا کر ایسا جشن منا رہی ہے جیسے کوئی بہت بڑا کارنامہ انجام دیا ہو۔

امیر جماعت اسلامی کراچی نے کہا کہ جو ریاست عوام کو سہولیات نہ دے اس کے خلاف جدوجہد ذمہ داری بھی اور عبادت بھی ہے۔