ناموس رسالت ﷺ کے معاملے پر اسپیکر قومی اسمبلی کی جانب سے قومی اسمبلی کا اجلاس طلب کرلیا گیا ہے۔

تفصیلات کے مطابق قومی اسمبلی اجلاس آج شام چار بجے منعقد ہوگا  جس میں اپوزیشن لیڈر راجہ ریاض بجٹ پر بحث کا آغاز کریں گے۔

اجلاس کے آغاز میں بی جے پی راہنماوں کی طرف سے توہین رسالت (ص) پر بحث ہوگی اور اس حوالے سے مذمتی قرارداد بھی پاس کی جائے گی۔

اس حوالے سے اسپیکر نے قومی اسمبلی اجلاس میں ایک گھنٹہ مختص کردیا جس میں بی جے پی لیڈروں کی ہرزہ سرائی کی مذمت کی جائے گی۔

اسپیکر قومی اسمبلی نے اپوزیشن کو بھی اجلاس میں شرکت کی دعوت دے دی ہے اور کہا ہے کہ یہ معاملہ سیاسی، جماعتی یا انفرادی نوعیت کا نہیں بلکہ ہمارے ایمان کا معاملہ ہے۔

خیال رہے کہ وزیراعظم شہباز شریف کی جانب سے بھارت میں ہونے والے اس قابل مذمت واقعے کے خلاف ایوان میں قرارداد منظور کرائی جانے کی ہدایت جاری کردی گئیں تھیں۔

وزیراعظم کا کہنا تھا کہ آقا کریم سے ہماری عقیدت و محبت کے اس اہم اور نازک معاملے پر ایوان میں بحث کرائی جائے۔

ان کا کہنا تھا کہ بھارت میں ہونے والے اس قابل مذمت واقعے کے خلاف ایوان قرارداد منظور کرے، قرارداد کے ذریعے بھارت سمیت پوری دنیا کو ہم بتا دینا چاہتے ہیں کہ آقا کریم کی حرمت کے لئے ہم ہر قربانی دینے کو تیار ہیں۔

وزیراعظم شہباز شریف نے ناموس رسالت (ص) کے معاملے پر اسپیکر راجہ پرویز اشرف سے پیر کو قومی اسمبلی اجلاس میں بحث کرانے کی درخواست بھی کی تھی۔