صدر مملکت ڈاکٹر عارف علوی نے کہا ہے کہ اسلامو فوبیا دنیا بھر میں اور بالخصوص بھارت میں بڑھ رہا ہے۔

 صدر مملکت ڈاکٹر عارف علوی سے پاکستان میں ترکی کے سبکدوش ہونے والے سفیر احسان مصطفیٰ یرادکل نے الوداعی ملاقات کی جس میں عارف علوی نے کہا کہ پاکستان اور ترکی کے برادرانہ تعلقات دونوں ممالک کے عوام کے دلوں میں بستے ہیں۔

 انہوں نے کہا کہ دونوں قومیں مشترکہ سماجی، ثقافتی اور مذہبی اقدار پر مبنی مثالی دوستانہ تعلقات کی حامل ہیں، امید ہے کہ باہمی طور پر فائدہ مند کثیر الجہتی تعلقات مستقبل میں بھی مضبوط سے مضبوط تر ہوں گے۔

ڈاکٹر عارف علوی نے کہا ہے کہ ترکی اور پاکستان نے دیگر مسلم ممالک کے ساتھ او آئی سی اور اقوام متحدہ سمیت مختلف فورمز پر اسلاموفوبیا کا مقابلہ کیا، مشترکہ کاوشوں کی بدولت اقوام متحدہ نے 15 مارچ اسلاموفوبیا سے مقابلے کے عالمی دن کے طور پر منانے کا اعلان کیا۔

صدر مملکت نے کہا ہے کہ اسلامو فوبیا دنیا بھر میں اور بالخصوص بھارت میں بڑھ رہا ہے، ہندوستان میں تمام مذہبی اقلیتوں، خاص طور پر مسلمانوں کوبلا خوف و خطر ظلم و تشدد کا نشانہ بنایا جا رہا ہے۔

انہوں نے کہا کہ بھارت میں مسلمانوں کے گھروں اور عبادت گاہوں کو مسمار کیا گیا، بھارت میں مسلمانوں کی مذہبی علامتوں اور شخصیات کی توہین کی گئی۔

 صدر مملکت نے تنازعہ جموں و کشمیر پر ترکی کی جانب سے پاکستان کی مستقل حمایت کا شکریہ ادا کرتے ہوئے کہا کہ دونوں ممالک غیرقانونی بھارتی زیرِتسلط جموں و کشمیر اور اقوام متحدہ کی تشکیل نو کے معاملے پر یکساں خیالات  کے حامل ہیں۔

 صدر مملکت ڈاکٹر عارف علوی نے سبکدوش ہونے والے سفیر کو اسلام آباد میں اپنی مدت ملازمت کی تکمیل پر مبارکباد دی اور پاک ترک دوطرفہ تعلقات کو مزید مستحکم کرنے میں سفیر کے ذاتی کردار کو  بھی سراہا۔