بھارتیہ جانتہ پارٹی (بی جے پی) رہنما نوپور شرما کے گستاخانہ بیان پر پاکستانی شوبز انڈسٹری کے نامور اداکار ومیزبان فیصل قریشی نے شدید غم و غصے کا اظہار کیا ہے۔

 فیصل قریشی نے انسٹاگرام پر بائیکاٹ انڈیا کے ہیش ٹیگ کو استعمال کر تے ہوئے ایک ویڈیو پیغام جاری کیا ہے۔

اپنے ویڈیو پیغام میں انہوں نے کہا کہ ’ابھی جو مسئلہ چل رہا ہے جس پر ہر ایک کو بات کرنی چاہیے، اُس پر سب اتنے خاموش کیوں ہیں؟، بھارت میں ایک خاتون نے ہمارے پیارے نبی ﷺ کے بارے میں گستاخانہ بیان دیا ہے جس پر تمام اُمتِ مسلمہ بھارت کا بائیکاٹ کر رہی ہے لیکن ابھی تک ہماری طرف سے کافی خاموشی ہے اور مجھے لگتا ہے کہ ہمیں اس پر بات کرنی چاہیے، باقاعدہ بائیکاٹ ہونا چاہیے۔

اداکار ومیزبان نے کہا کہ ’جب مجھے مختلف جگہوں پر کچھ چیزیں اور تصاویر دیکھنے کو ملتی ہیں تو تکلیف ہوتی ہے کیونکہ میرے لیے اور تمام اُمتِ مسلمہ کے لیے نبی کریم ﷺ کی ذات سے بڑھ کر کچھ بھی نہیں ہے۔

آخر میں فیصل قریشی نے تمام پاکستانیوں اور اُمتِ مسلمہ سے اپیل کرتے ہوئے کہا کہ میں چاہتا ہوں کہ آپ اس پر بات کریں، اپنا احتجاج ریکارڈ کروائیں کیونکہ اب پانی سر سے گُزر چکا ہے۔

واضح رہے کہ بی جے پی ترجمان نوپور شرما نے ایک ٹی وی چینل پر اسلام اور پیغمبرِ اسلام حضرت محمدﷺ کی شان اقدس میں گستاخانہ گفتگو کی تھی۔

سوشل میڈیا صارفین کی جانب سے بھی بی جی پے رہنما کے اس اقدام پر کڑی تنقید کی جارہی ہے اور بھارتی میڈیا کی رپورٹس کے مطابق نوپور شرما کی پارٹی رکنیت ختم کردی گئی ہے۔