جی ڈی اے کی رکن سابق اسپیکر ڈاکٹر فہمیدہ مرزا کراچی میں لوڈشیڈنگ پر ایوان میں برس پڑیں۔

رکن قومی اسمبلی ڈاکٹر فہمیدہ مرزا نے قومی اسمبلی اجلاس میں اظہار خیال کرتے ہوئے کہا کہ حکومت وزارت توانائی کو اتنی بڑی رقم دینے کا مطالبہ کررہی ہے مگر اس کی کارکردگی کیا ہے۔

انہوں نے کہا کہ اندرون سندھ میں تو بجلی نہ ملنے کا عذاب چل ہی رہا تھا ، آج کراچی میں لوڈشیڈنگ کی وجہ سے عوامی احتجاج سامنے آیا ہے جبکہ آج بجلی مانگنے والوں پر پولیس نے تشدد بھی کیا ہے۔

رکن قومی اسمبلی ڈاکٹر فہمیدہ مرزا نے مزید کہا کہ بجلی کا نظام بالکل ناکام ہوگیا ہے، آج بجلی مہنگی سے مہنگی کی جارہی ہے۔

واضح رہے کہ نیشنل الیکٹرک پاور ریگولیٹری اتھارٹی (نیپرا) نے بجلی کی قیمت میں فی یونٹ 7.90 روپے اضافے کی منظوری دی ہے۔

بجلی مہنگی کرنے کی منظوری مئی کی ماہانہ فیول ایڈجسٹمنٹ کی مد میں کیا گیا جو صارفین سے جولائی کے بل میں وصول کیا جائے گا۔

سینٹرل پاور پرچیزنگ ایجنسی (سی پی پی اے) نے توانائی کے شعبے کے ریگولیٹرز سے درخواست کی تھی کہ مئی کے دوران مختلف ذرائع سے حاصل ہونے والی بجلی کی مجموعی پیداوار پر فی یونٹ 13 روپے 90 پیسے خرچ ہوئے۔

تاہم فیول ایڈجسٹمنٹ چارجز کی مد میں نیشنل الیکٹرک پاور ریگولیٹری اتھارٹی (نیپرا) کی جانب سے مقرر کردہ 5 روپے 93 پیسے فی یونٹ کے بینچ مارک سے زیادہ 7 روپے 96 پیسے تک اضافی خرچ ہوئے۔

سی سی پی اے کی جانب سےدائر درخواست میں نشاندہی کی گئی تھی کہ مئی میں فرنس آئل سے بہت مہنگی بجلی پیدا کی گئی جس پر فی یونٹ 33 روپے 67 پیسے خرچ ہوئے اور ہائی اسپیڈ ڈیزل سے پیدا ہونے والی بجلی کے اخراجات 30 روپے 9 پیسے فی یونٹ رہے۔